Ադրբեջանը կարող էր խորը փոշմանել, որ այդ դիրքերը վերցրել է. Մանվել Սարգսյան

Երկիրը պատերազմում է այն ժամանակ, երբ դա տալիս է արդյունք. Հետեւաբար պետք է մի վիճակ ստեղծել, որ Ադրբեջանին պատերազմը օգուտ չբերի, այլ վնաս բերի: Այս մասին, այսօր՝ հուլիսի 16-ին, Արցախում տեղի ունեցող քննարկման ժամանակ նշել է ռազմավարական եւ ազգային հետազոտությունների հայկական կենտրոնի ղեկավար, քաղաքագետ Մանվել Սարգսյանը:

Նրա խոսքով, ապրիլյան պատերազմի ժամանակ նման վիճակ ստեղծվել էր, երբ Ադրբեջանը կարող էր խորը փոշմանել, որ այդ դիրքերը վերցրել է: «Նա երազում էլ չէր կարող տեսնել, որ ամբողջ աշխարհը, մինչեւ ՄԱԿ-ի գլխավոր քարտուղար, հանկարծ կբարձրացնեն 1994 թվականի պայմանագրերը եւ կասի, որ ղարաբաղյան խնդրի հիմքը սա է: 20 տարի Ադրբեջանը աշխատում էր, որ ասի՝, որ Ղարաբաղի հիմքը ՄԱԿ-ի 4 բանաձեւերն են ու հանկարծ ՄԱԿ-ի գլխավոր քարտուղարն ասում է՝ ոչ, 1994 թվականինն է: Սա այն աստիճանի պարտություն է Ադրբեջանի համար, որ նա փորձում է Ռուսաստանի միջոցով դուրս գա դրա տակից, բայց Ռուսաստանն էլ դրան չգնաց»,-ասաց նա:

Քաղաքագետի խոսքով, դա ստեղծել է մի վիճակ, եր Հայաստանի համար պարզ էր Ադրբեջանին զսպելու քաղաքականությունը: «Պետք է Ադրբեջանի համար այնպիսի պարտություն, այնպիսի փոս ստեղծել, որ պատռկերավոր ասած, մամոնտը կանգնի ու ասի՝ արժի՞ 10 հոգու հետեւից վազեմ, եթե ընկնելու եմ փոսը: Դրա սկիզբը կարծես թե դրվեց, քանի որ ամբողջ աշխարհը վկայակոչեց 1994-ի պայմանագրերը եւ Հայաստանից միայն պահանջվում էր ասել, որ Ադրբեջանը պիտի վերադառնա այն քարտեզին, որը կպցրած է 1994-95 թվականի պայմանագրերի վրա ու վերջ: Փաստորեն դրանով Ղարաբաղի բանակն ստացել է այն իրավունքը, որ զինված պայքարով վերադարձնի այն դիրքերը, որոնք այդ քարտեզով իր վերահսկողւթյան տակ են: Իսկ ի՞նչ արեց Սերժ Սարգսյանը: Նա գնաց Մոսկվա եւ Ալիեւի հետ վիժեցրին այդ ամենը»,-ամփոփեց քաղաքագետը: