Ինչո՞ւ Թուրքիայում հեղաշրջումը ձախողվեց. Süddeutsche Zeitung

Թուրքիայում զինվորականները բնակչության շրջանում այնպիսի բարձր հեղինակություն են վայելում, ինչպիսին չունեն ՆԱՏՕ-ի անդամ մյուս երկրների զինված ուժերը: Սակայն այն միաձայնությունն ու եռանդը, որով Թուրքիայի հասարակությունը այս անգամ ռազմական հեղաշրջման դեմ դուրս եկավ, զարմանալի էր: Այս մասին գրում է գերմանական Süddeutsche Zeitung պարբերականը՝ դիտարկելով Թուրքիայում հեղաշրջման փորձի ձախողման պատճառները:

Զինվորականները. Պարզվեց, որ հեղաշրջման փորձն աջակցություն չի գտել բոլոր զինվորականների շրջանում: Ընդհակառակը, խռովարարները ռազմաօդային բազայի տարածքում փակել էին Գլխավոր շտաբի պետ Հուլուսի Աքարին, որն Էրդողանի վստահելի անձանցից է: Գեներալների մեծ մասը բացահայտ դեմ դուրս եկավ հեղաշրջմանը: F-16 կործանիչները կրակ բացեցին հեղաշրջման առաջնորդների տանկերի վրա, ռազմական ուղղաթիռ խոցեցին: Շտաբի պետ Աքարը, իրականացրած գործողությունների արդյունքում, ազատ արձակվեց: Նախագահ Էրդողանի եւ վարչապետ Յըլդըրըմի՝ զինվորականներին ուղղված կոչեր հնչեցին:

Ընդդիմությունը. Քրդական «Ժողովուրդների դեմոկրատական կուսակցության», «Ազգայնական շարժման» ներկայացուցիչները, քեմալականները, որոնք իշխող «Արդարություն եւ զարգացում» կուսակցության հետ ավելի քան 10 տարի բախումների մեջ են, մերժեցին հեղաշրջումը: Քաղաքացիական հասարակության բոլոր կազմակերպությունները, ՀԿ-ները, սոցիալական մեդիայի ներկայացուցիչները Էրդողանին բռնի տապալելու դեմ դուրս եկան: Ոչ մի հեռուստալրագրող կամ թերթի լրագրող, այսինքն՝ նրանք, ովքեր բոլորից շատ են տուժում Էրդողանի բռնապետական ռեժիմից, չանցավ ապստամբների կողմը: Ընդհակառակը, համացանցում հայտնված տեսանյութում երեւում է, թե ինչպես են նրանք համոզում խմբագրությունը գրաված զինվորներին հրաժարվել հեղաշրջման գաղափարից:

Մզկիթները. Ստամբուլում եւ Իզմիրում կեսգիշերից հետո երկար ժամանակ մինարեթներից Էրդողանին հավատարիմ մնալու կոչեր էին հնչում: Քաղաքացիները փողոց էին դուրս եկել եւ զինվորներին ստիպում լքել ռազմավարական կարեւոր կետերը, որոնք նրանց հսկողության տակ էին: Շատ դեպքերում մարդիկ ինքնադատաստան էին տեսնում խռովարարների հետ:

Էրդողանն իր ելույթներից մեկի ժամանակ հեղաշրջումն Աստծո պարգեւ անվանեց: Հիմա նա հնարավորություն ունի մաքրել զինվորական շրջանակները՝ Գյուլենական շարժման ազդեցությունը կանգնեցնելու համար: Էրդողանը ժամանակ չի կորցնում. Թուրքիայում այս պահին պաշտոնանկ է արվել 2.7 հազար դատական համակարգի աշխատող, աշխատանքից ազատվել է 5 գեներալ եւ 28 գնդապետ, ձերբակալվել շուրջ 3 հազար զինվորական: Արյունոտ գիշերվա հաջորդ առավոտյան պարզ դարձավ. Թուրքիային մռայլ ժամանակներ են սպասվում, եզրափակում է թերթը: