Դուրս գալու եք հանրահավաքի՞, թե՞ կուսակցական զնաչոկի հետևում եք թաքնվելու

Էդգար Խաչատրյանը ֆեյսբուքյան իր էջում գրում է .

Լույսի գինը թանկացավ, Ռոբերտ Նազարյանն էլ քֆուրների տակ մնաց: Էս ամենն ունենալով մեր ձեռքի տակ՝ մի փոքրիկ հաշվարկ անենք:

Անցած տարի դեկտեմբերին դոլարի վայրիվերումների պատճառով շատ ապրանքներ թանկացան, իսկ վերահսկող մարմինների ոչ ճիշտ աշխատանքի հետևանքով թանկացած ապրանքների գները դոլարի գնի նվազումից հետո այդպես էլ չէժանացան, եկեք դրան գումարենք անցած տարի լույսի ևս 4 դրամ թանկացումից հետո տեղի ունեցած շղթայական թանկացումն ու աշխատավարձի ցածր լինելը, իսկ որոշ կազմակերպություններ էլ ուղղակի աշխատավարձեր կրճատեցին, ստացվում է, որ ժողովրդի վիճակն այս պահին արդեն ծանր է:

Հիմա նոր հարված՝ Բիբինի «կայֆերի» համար պետք է վճարի ժողովուրդը խորագրով: Այսօր Ռ. Նազարյանի գլխավորած կառույցն իրարամերժ հայտարարություններ անելուց հետո հլու-հնազանդ կերպով կողմ քվեարկեց հոսանքի թանկացմանը: 6.93 դրամդ շնորհավոր լինի, Բիբին, դու էլի կարաս մի «դաստա» քարտուղարուհի պահես, հրեղեն ակերով ջիպ քշես ու Անգլիայի թագուհուն վայել բնակարանում ապրես: Էս ժողովուրդն էլ կվճարի, ի՞նչ ա եղել:

Այսօր էլ ոստիկանները ձու նետելու համար մարդ են տանում բաժին: Հետո՞, անունն ի՞նչ եք դնում: Էդ մարդկանց շնորհիվ կարող ա դուք էլ խուսափեիք հոսանքի թանկացումից, դե հիմա օգոստոսի մեկին աշխատանքի ոտքով կիջնեք, որ հարյուր դրամները պահեք ու լույսի գումար վճարեք, թե չէ լույս չի լինի, համազգեստը ստիպված ձեռքով կլվանաք:

ԱԺ-ում բոլորը խոսում էին լույսի թանկացման դեմ: Դե հիմա տեսնեմ՝ ի՞նչ քայլեր եք անելու: Դուրս գալու եք հանրահավաքի՞, թե՞ կուսակցական զնաչոկի հետևում եք թաքնվելու: Մի՛ արեք բաներ, որոնց համար պատասխան չեք կարողանալու տալ: