Մյունխենի հրաձիգը ողբերգության օրը տապալել է տեխնիկումի քննությունը

Մյունխենի առևտրի կենտրոններից մեկում ուրբաթ երեկոյան սպանդ սարքած երիտասարդն ուներ հասակակիցների հետ շփման լուրջ խնդիրներ, իսկ ողբերգության օրը տապալել է տեխնիկումի քննությունը։ Այս մասին հայտնել է գերմանական Bild am Sonntag (BamS) թերթը՝ վկայակոչելով ոստիկանության աղբյուրները։

Երիտասարդի անունն Ալի Դավիդ Սոնբոլի էր, նա Գերմանիայի քաղաքացի է, որը ծնվել էր իրանցիների ընտանիքում. հայրը տաքսիստ է, մայրն աշխատում է խոշոր առևտրային կենտրոնում։ Նա ծնվել և մեծացել է Մյունխենում, Դախաուեր-շտրասե, Մաքսֆորշտադ թաղամասի այդ մասն անապահով է համարվում։

Ինչպես գրում է պարբերականը, Սոնբոլիին ծաղրուծանակի էին ենթարկում թուրք և արաբ հասակակիցները։ Մի քանի տարի առաջ նա կողոպուտի էր ենթարկվել, ոստիկանություն էր դիմել մի քանի անգամ ծեծի ենթարկվելուց հետո։ BamS-ը նշում է, որ մյունխենյան հրաձիգի մոտ ախտորոշվել է ուշ ադրության և հիպերակտիվության պակասի համախտանիշ

Ինչպես հաղորդում է ՏԱՍՍ-ը, քննիչները ենթադրում են, որ Սոնբոլին կարող էր համակրել Անդերս Բրեյվիկին, ով սպանդ էր սարքել Նորվեգիայում հինգ տարի առաջ։ Երիտասարդի սենյակում եղել են գրքեր, որտեղ նկարագրվում են դպրոցներում կատարված զանգվածային սպանություններ։ Տեղի ԶԼՄ-ներն ակտիվորեն զուգահեռներ են տանում մյունխենյան և նորվեգական հրաձիգների միջև. չէ որ Սոնբոլին հանցագործությունը կատարել է Բրեյվիկի կողմից սպանդն իրականացնելուց ուղիղ 5 տարի հետո։ Բացի այդ, Մյունխենում կիարառվել է Glock-17 ատրճանակը, որն օգտագործել է նաև Բրեյվիկը։

Սոնբոլին սպանել է 10 մարդ, ինչից հետո ինքնասպան է եղել։ Նրա գործողության տուժող է համարվում 35 մարդ, ներառյալ նրանք, ովքեր վնասվածքներ են ստացել հրմշտոցներում։ Դրանք ամբողջ քաղաքում առաջացել են, երբ խուճապ է առաջացել «սուր ահաբեկչական իրավիճակի» մասին լուրի տարածումից հետո։