Վիքիակումբները կոտրում են կարծրատիպը, որ IT տեխնոլոգիաները կենտրոնացած են միայն Երևանում

BlogNews.am-ը գրում է.

Հայերեն Վիքիպեդիայի զարգացմանն ուղղված նախագծերի մասինBlogNews.am-ն արդեն պատմել է։ «Ինտելեկտուալ Ռենեսանս» հիմնադրամի ու «Վիքիմեդիա Հայաստան» կազմակերպության նախաձեռնությամբ Հայաստանի տարբեր մարզերում 2014 թվականի մարտից գործում են Վիքիակումբներ։ Տեխնիկապես հագեցած այս ակումբներում երեխաները կարող են օգտվել համակարգիչներից ու խմբագրել հայերեն Վիքիպեդիան։

Այս նախագծի շնորհիվ կոտրվում է կարծրատիպը, որ IT տեխնոլոգիաները կենտրոնացած են միայն Երևանում, և միայն մայրաքաղաքում բնակվող պատանիներն ու երիտասարդներն են տիրապետում ժամանակակից տեխնոլոգիաներին։

«Երևանաբնակների զբաղմունքներն ավելի շատ են, այդ իսկ պատճառով մարզերի երեխաներն ավելի շատ են հետաքրքրվում Վիքիպեդիան խմբագրելով։ Մարզերում շատերը նույնիսկ համակարգիչ չունեն, որպեսզի խմբագրումներ անեն Վիքիպեդիայում։ Մենք նրանց ընձեռնում ենք այդ հնարավորությունը՝ բացելով Վիքիակումբներ, ապահովելով անհրաժեշտ գույքով և տեխնիկայով»,- BlogNews.am-ի հետ զրույցում ասաց «Վիքի» ծրագրերի պատասխանատու Արսեն Հարությունյանը։

Երեխաների գործունեությունը չի սահմանափակվում միայն Վիքիպեդիա խմբագրելով։ Նրանց համար կազմակերպվում են նաև ակտիվ միջոցառումներ, կրթական խաղեր, որպեսզի երեխաները չկենտրոնանան միայն Վիքիպեդիա խմբագրելու վրա։ «Որքան էլ դա շատ հետաքրքիր ու լավ աշխատանք է, միօրինակությունից բոլորն էլ հոգնում են»,- նկատեց Արսեն Հարությունյանը։

«Վիքի» ծրագրերի պատասխանատուից տեղեկացանք, որ իրենց իրականացրած ծրագրերի շնորհիվ հայերեն Վիքիպեդիան այսօր շատ ավելի հարուստ և հավաստի է։ «Երբ սկսում էինք նախաձեռնությունը, հայերեն Վիքիպեդիայում հոդվածների թիվն ու որակն այլ էր։ 2013 թվականի հոկտեմբերին կար 40.000 հոդված, այժմ թիվը հասնում է 170.000-ի»,- նշեց նա։

Վիքիակումբ կարող են հաճախել բոլոր ցանկացողները, թե նրանք որքան ժամանակ կմնան այնտեղ, իրենց ընտրությունն է։ Կազմակերպիչները համագործակցում են տվյալ մարզի դպրոցների հետ և այնտեղից երեխաներ ներգրավում։ Վիքիակումբների գործունությունը չի սահմանափակվի միայն մարզկենտրոններով։ Կազմակերպիչները մտադիր են դրանք տարածել նաև փոքր համայնքներում և գյուղերում։

Նյութը՝ Ամալյա Հովհաննիսյանի