4 անձի դանակահարություն՝ Աշտարակում. նրանք ի վիճակի չեն խոսելու

Հ քննչական կոմիտեի Արագածոտնի մարզային քննչական վարչությունում քննություն է տարվում՝ պարզելու 4 անձի դանակահարության դեպքի հանգամանքները։

ՀՀ Քննչական կոմիտեիցNEWS.am-ին հայտնում են, որ 2016թ. օգոստոսի 4-ին` ժամը 20:10-ին, «Աշտարակ ԲԿ» ՓԲԸ-ից ահազանգ է ստացվել, որ «կրծքավանդակի աջ կեսի ծակած-կտրած թափանցող վերքեր» ախտորոշմամբ հիվանդանոց է տեղափոխվել 40-ամյա Վ. Մովսիսյանը, ինչպես նաեւ ծակած-կտրած տարբեր վերքերով՝ 32-ամյա Ռ. Ջուլհակյանը, 47-ամյա Գ. Գարանյանը եւ 37-ամյա Ա. Միրզոյանը:

Արագածոտնի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով: Մշակվել է քննչական պլան, եւ ձեռնարկվում են  անհրաժեշտ քննչական գործողություններ՝ 4 անձանց՝ մարմնական վնասվածքներ ստանալու հանգամանքները, առերեւույթ հանցագործություն  կատարած անձի ինքնությունը պարզելու ուղղությամբ։

Քննության ընթացքում նախնական տվյալներ են ձեռք բերվել հնարավոր դեպքի վայրերի մասին, կատարվել են զննություններ, որոնց  արդյունքում հայտնաբերվել եւ վերցվել են արնանման հետքեր, բջջային հեռախոս  եւ այլ առարկաներ: Առգրավվել է նաեւ հարակից խանութի տեսանկարահանման սարքը:

Հարցաքննվել են մի շարք վկաներ, քրեական գործով էական նշանակություն ունեցող հանգամանքները պարզելու համար նշանակվել են փորձաքննություններ։

Ըստ բժշկական կենտրոնից ստացված տեղեկանքի՝ մարմնական վնասվածքներ ստացած անձինք ի վիճակի չեն մասնակցել քննչական գործողությունների:

Կատարվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ եւ լրիվ հետազոտումն ապահովելու ուղղությամբ։