ՊՊԾ գնդի երկշաբաթյա գրավումը. Օր օրի. Ինչպես է եղել դա

News.am-ը գրում է . 

Վաղ առավոտյան զինված անձանց խումբը, որն իրեն «Սասնա ծռեր» է կոչում, գրավել է Էրեբունու շրջանում գտնվող ՀՀ ոստիկանության պարեկա-պահակային պահպանության (ՊՊԾ) գունդը: Գրավման ընթացքում զոհվել է գնդի փոխհրամանատարԱրթուր Վանոյանը, վիրավորվել է «Սասնա ծռեր» խմբից Թաթուլ Թամրազյանը, ինչպես նաեւ ոստիկանության չորս աշխատակից` ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ենթասպա Գագիկ Մկրտչյանը, օպերատոր Ռոբերտ Հայրապետյանը: Մի քանի ոստիկան պատանդառվել է:

Արթուր Վանոյան

Facebook սոցիալական ցանցում խումբը հայտարարություն է հրապարակել. «Մենք զինված ապստամբություն ենք սկսել, միացեք»: Խմբի պահանջներն են` նախագահ Սերժ Սարգսյանի հրաժարական եւ ապօրինի զենք պահելու մեղադրանքով մոտ մեկ ամիս առաջ կալանավորված ընդդիմադիր գործիչ Ժիրայր Սեֆիլյանի ազատ արձակում:

NEWs.am-ը համառոտ ներկայացնում է ժամանակագրությունը, թե ինչպես են զարգացել իրադարձությունները:

Հուլիսի 17

• Ոստիկանությունը փակել է ՊՊԾ գնդին հարող բոլոր փողոցները: Շենքի բոլոր մուտքերը շրջապատված են:
• ԱԱԾ-ն խմբի անդամներին բնութագրում է որպես ահաբեկիչների: 
• Հայաստանի նախագահ Սերժ Սարգսյանը ՊՊԾ գնդի գրավման կապակցությամբ խորհրդակցություն է հրավիրում:
• ԱԱԾ-ն հայտնում է երկու պատանդի ազատ արձակման մասին: Նրանց անունները չեն հաղորդվում: Բանակցություններ են սկսվում: 
• Երեւանում, Գյումրիում եւ Վանաձորում ձերբակալում են «Հիմնադիր խորհրդարանի» կողմնակիցներին, որոնք աջակցում են «Սասնա ծռերին»: Մայրաքաղաքում մի քանի տասնյակ մարդ բերման է ենթարկվում: Նրանց մի ասը հայտարարում է իրավապահ մարմինների կողմից բռնության ենթարկվելու մասին: 

Հուլիսի 18

• ՊՊԾ գնդի մոտ են ժամանել ՀՀ ոստիկանության պետ Վլադիմիր Գասպարյանը եւ ԱԱԾ պետ Գեորգի Կուտոյանը: Նրանք հեռանում են` չպատասխանելով լրագրողների հարցերին:
• Իրավապահ մարմիններ. Գիշերը ազատ է արձակվել մեկ պատանդ: Նրա անձը չի բացահայտվում:
• ԱԱԾ-ն հայտնում է, որ գիշերը երկու մարդ է ազատ արձակվել` ոստիկան եւ քաղաքացիական անձ` շտապօգնության մեքենայի վարորդը: Նրանց անունները չեն հաղորդվում:
• Հայաստանի ոստիկանության պետի տեղակալ Հունան Պողոսյանը հայտնում է, որ այդ պահի դրությամբ պատանդառված է 5 ոստիկան, այդ թվում ոստիկանության պետի տեղակալ Վարդան Եղիազարյանը եւ Երեւանի ոստիկանության պետի տեղակալ Վալերի Օսիպյանը:
• ՊՊԾ գնդի գրավման հետ կապված քրեական գործ է հարուցվում:
• Խորենացի փողոցից բերման են ենթարկվում պաստառներով երեք աղջիկներ: Նրանցից երկուսը «Հիմնադիր խորհրդարանի» անդամ Կարո Եղնուկյանիդուստրերն են:
• «Ազատության» հրապարակում տեղի է ունենում «Ոչ թալանին» նախաձեռնության կազմակերպած ակցիան, որի մասնակիցները հայտնում են, որ «Սասնա ծռերը» ահաբեկիչներ չեն, այլ հեղափոխականներ: Նրանք պահանջում են առանց արյունահեղության հանգուցալուծել իրավիճակը: Ոստիկանները բերման են ենթարկում Դավիթ Սանասարյանին եւ պատգամավոր Նիկոլ Փաշինյանի որդուն:  

Հուլիսի 19

• «Հիմնադիր խորհրդարանի» անդամ Ալեք Ենիգոմշյանին թույլ են տալիս մտնել ՊՊԾ գնդի շրջակա տարածք: Նա «Սասնա ծռերին» է փոխանցում ԱԱԾ-ի առաջարկ-պահանջը, որի պարունակությունը չի բացահայտում: Ենիգոմշյանըհաստատում է. բանակցություններին միջնորդավորված մասնակցում է Ժիրայր Սեֆիլյանը:  
• Խմբի անդամների հետ հեռախոսակապն ընդհատվում է:
• Խորենացու փողոցում հավաքված ցուցարարների եւ ոստիկանության միջեւ բախումներ են տեղի ունենում (ֆոտոռեպորտաժ): Հաղորդվում է ՊՊԾ գնդի կողմից կրակոցների մասին:  Ակտիվիստներից մեկը հայտնում է, որ կապվել է  «Սասնա ծռերի» անդամ Վարուժան Ավետիսյանի հետ, որը հայտնել է, որ իրենք են օդ կրակել ցուցարարներին աջակցելու համար:
• Սարի թաղում եւս բախումներ են տեղի ունենում: Ոստիկանության փոխանցմամբ, մարդիկ փորձել են ներթափանցել պահպանվող տարածք, քարեր եւ տարբեր իրեր են նետել ոստիկանների ուղղությամբ:  Երկու կողմերիցտուժածներ կան: Քրեական գործ է հարուցվում իշխանության ներկայացուցիչների նկատմամբ բռնություն կիրառելու փաստի առթիվ:
• Լուրեր են տարածվում, որ Երեւան են տեղափոխել Ռուսաստանի ԱԴԾ-ի «Ալֆա» ջոկատի հատուկջոկատայիններին: Դրանք հերքում է Հայաստանի ոստիկանության Երեւանի քաղաքային վարչության պետ Աշոտ Կարապետյանը:  

Հուլիսի 20

• «Սասնա ծռերին» աջակցելու մեղադրանքով ձերբակալվում են «Հիմնադիր խորհրդարանի» անդամներ Խաչատուր Գիչյանը եւ Կարո Եղնուկյանը:
• Մշակույթի գործիչները նամակով դիմում են Ժիրայր Սեֆիլյանին` խնդրելով իր ընկերներին կոչ անել վայր դնել զենքը եւ հանձնվել իրավապահ մարմիններին:
• Երեկոյան Խորենացու փողոցում ոստիկանությունը ցրում է ցուցարարներին՝ օգտագործելով հատուկ միջոցներ՝ լուսաձայնային նռնակներ ու արցունքաբեր գազ: Ցուցարարները պահանջում են լուծել «Սասնա ծռերի» անդամներին սննդով ապահովելու հարցը: ԱԺ պատգամավոր Նիկոլ Փաշինյանը փորձում է լուծել այդ հարցը, սակայն չի հաջողվում: Բերման է ենթարկվում 136 մարդ, հիվանդանոցներ են տեղափոխվում 51 մարդ, որից 29-ը` ոստիկաններ: Տուժածների թվում լրագրողներ կան: Իշխանությունները քրեական գործ են հարուցում Երեւանում զանգվածային անկարգությունների փաստով: 

Հուլիսի 21

• Ձերբակալվում է ղարաբաղյան պատերազմի մասնակից Արարատ Խանդոյանը` «Սասնա ծռեր» խմբի անդամ, «Միայնակ գայլ» մականունովԱրայիկ Խանդոյանի եղբայրը: 
• Մի քանի հարյուր քաղաքացիներ դարձյալ հավաքվում են Խորենացու փողոցում` պահանջելով սնունդ փոխանցել «Սասնա ծռերին»: Սննդի հարցը լուծվում է ԼՂՀ-ից Երեւան եկած Արցախի հերոս, գեներալ Վիտալի Բալասանյանի միջնորդությամբ: ՊՊԾ գնդի տարածքից «Սասնա ծռերը» հրավառություն են կազմակերպում՝ այդկերպ ողջուներով հավաքվածներին: Ոստիկանությունը ցրում է ակցիայի մասնակիցներին` ոմանց նկատմամբ կոշտ ուժ կիրառելով: 

Հուլիսի 22

• Նախագահ Սերժ Սարգսյանը խորհրդակցություն է անցկացնում ԱԱԾ-ի, ոստիկանության, գլխավոր դատախազության եւ քննչական մարմինների ղեկավարների մասնակցությամբ. «Այս իրավիճակն արդեն ավելի երկար է տեւում, քան մենք կարող ենք մեզ թույլ տալ: Պատանդները պետք է ազատվեն: Զինված խումբը պետք է վայր դնի զենքը»:
• ՀՀ առաջին նախագահ Լեւոն Տեր-Պետրոսյանը մեկնաբանում է իրավիճակը.   «Անհրաժեշտ է մի կողմ դնել ներքին խնդիրները եւ միաձայն դիմակայել արտաքին մարտահրավերներին»: 
• Նիկոլ Փաշինյան. «Տեր-Պետրոսյանը դաշինք է կազմել Սերժ Սարգսյանի հետ՝ Լավրովի պլանն իրագործելու համար»:
• ԱԱԾ-ն հայտարարություն է տարածում այն մասին, որ ոստիկանության գունդը գրավողների աջակիցների խումբ է ձերբակալել: 
• Հանրահավաք Խորենացու փողոցում: Գիշերը հանգիստ է անցնում: Ցուցարարների մի մասը լուսաբացը դիմավորում է փողոցում:

Հուլիսի 23

• Խմբի անդամ Վարուժան Ավետիսյանը Վիտալի Բալասանյանի միջնորդությամբ հանդիպում է ԱԱԾ տնօրեն Գեորգի Կուտոյանին: Որոշում է կայացվում ազատ արձակել բոլոր պատանդներին, որի դիմաց գնդի տարածքում մամուլի կենտրոն կստեղծվի, կապահովվի անխափան ինտերնետը կամ եւ ուղիղ հեռախոսակապ:
• «Սասնա ծռերը» ինքնակամ ազատ են արձակում երկու ոստիկանի: 
• Բաց են թողնվում վերջին պատանդները` Հայաստանի ոստիկանության պետի տեղակալ Վարդան Եղիազարյանը եւ Երեւանի ոստիկանության պետի տեղակալ Վալերի Օսիպյանը: 
• Գնդի տարածքում մամուլի ասուլիս է տեղի ունենում (ֆոտոռեպորտաժ): «Սասնա ծռերի» անդամ Պավլիկ Մանուկյանը մարդկանց կոչ է անում դուրս գալ փողոց եւ պայքար սկսել իշխանությունների դեմ:  
• Վարուժան Ավետիսյանը հայտնում է, որ խմբի անդամներին չեն տալիս խոստացված ուղիղ կապը. «Մենք զենք ենք վերցրել` համոզված լինելով, որ այսուհետ անհնար է այլ եղանակով փոփոխությունների հասնել: Մենք նոր պետություն ենք ստեղծում»:
• «Սասնա ծռերը» հրաժարվում են Վիտալի Բալասանյանի միջնորդությունից` մեղադրելով նրան Ժիրայր Ավետիսյանի խոսքերն աղավաղելու մեջ:
• Խորենացի փողոցում հերթական ցույցն է տեղի ունենում ի աջակցություն «Սասնա ծռերի»: Նիկոլ Փաշինյանը լքում է հանրահավաքը՝ դա բացատրելով արյունահեղությունից խուսափելու ցանկությամբ: Գիշերը հանգիստ է անցնում: Եկածների մի մասը փողոցում է մնում մինչեւ առավոտ: 

Հուլիսի 24

• Վիտալի Բալասանյանը հայտարարություն է տարածում. «Սասնա ծռերի» հանձնվելու դեպքում նախագահը պատրաստ է զրուցել Սեֆիլյանի հետ:  
• Հանրահավաք Խորենացի փողոցում. հայտարարվում է, որ Բալասանյանին միջնորդի դերում կփոխարինի «Սիսական» ջոկատի հրամանատար Աշոտ Մինասյանը` «Աշոտ Երկաթ», սակայն նա չի ստանձնում այդ դերը: 
• Ենիգոմշյանը հայտնում է, որ խմբի անդամները մեկ օր է` սնունդ չեն ստացել, գնդի տարածքում էլեկտրականություն չկա: Ի նշան բողոքի ոստիկանական «ԳԱԶել» են այրում:
• Գիշերն անցնում է առանց բախումների ոստիկանության հետ: Որոշ քաղաքացիներ բերման են ենթարկվում:

Հուլիսի 25

• ԱԱԾ-ն խմբին կոչ է անում հանձնվել իշխանություններին եւ ներկայացնում էքրեական պատասխանատվությունից ազատման պայմանները:
• Հետախուզում է հայտարարվում «Հիմնադիր խորհրդարանի» հիմնադիրներից Գարեգին Չուգասզյանի նկատմամբ: 
• Ոստիկանությունը հրապարակում է ՊՊԾ-ն գրաված զինված խմբի անդամների անունները: «Սասնա ծռերի» խմբում 31 մարդ կա: 
• Հանրահավաք Խորենացու փողոցում. Ենիգոմշյանը հայտնում է, որ ժողովուրդն իշխանություններին մինչեւ առավոտվա 9-ը ժամանակ է տալիս: Այդ ժամին Խորենացի փողոց սնունդ կբերեն խմբի անդամների համար: Նոր բանակցող չկա:  
• Ոստիկանությունը հայտնում է, որ խմբի անդամները գնդի տարածքից եւս 2 մեքենա են հանել եւ այրել: Փոխհրաձգություն է տեղի ունենում: Ոտքի հրազենային վնասվածք են ստանում խմբի անդամներ Աշոտ Պետրոսյանը եւ Հովհաննես Հարությունյանը: Նրանք հիվանդանոց են տեղափոխվում: 

Աշոտ Պետրոսյան

Հովհաննես Հարությունյան

Հուլիսի 26

• Լուսաբացին Արթուր Սարգսյանը, իր մեքենան սննդամթերքով բեռնելով,կտրում է ոստիկանական շղթան եւ սնունդ հասցնում «Սասնա ծռերին»:
• Խորենացու փողոցում ցույց է: Մասնակիցները երթ են կազմակերպում դեպի ոստիկանության եւ ԱԱԾ-ի շենքեր: Տասնյակ քաղաքացիներ բերման են ենթարկվում,  «կարմիր բերետավորները» Խորենացու փողոցում պոկում են նախագահի հրաժարականի պահանջով պաստառը:  
• Ոստիկանության փոխանցմամբ, «Սասնա ծռերի» երկու անդամ` Գագիկ Եղիազարյանը եւ Արամ Հակոբյանը հանձնվում են իրավապահ մարմիններին, նաեւ փոխհրաձգություն է տեղի ունենում, որի հետեւանքով վիրավորվում է Գեւորգ Իրիցյանը, Պավլիկ Մանուկյանը, նրա որդին` Արամը, եւ իրավապահ մարմինների աշխատակից: Պավլիկ Մանուկյանը եւ նրա որդին` Արամը, հիվանդանոց են տեղափոխվում: «Հիմնադիր խորհրդարան» նախաձեռնության հաղորդմամբ, ոստիկանությունը հարձակվել է խմբի վրա եւ  «գողացել» «Սասնա ծռերի» չորս անդամներին:
• Ոստիկանությունը հայտնում է, որ ՊՊԾ գնդի տարածքում դեռեւս երկու վիրավոր է մնում:

Պավլիկ Մանուկյան

 Արամ Մանուկյան

Հուլիսի 27

• Ոստիկանությունը հայտնում է, որ խումբը պատանդ է վերցրելՇտապօգնության աշխատակիցներին:
• Ենիգոմշյան. «Բժիշկներ պատանդ չեն վերցվել: Ներսում երկու վիրավոր կա: Տղաներն ուղղակի ուզում են, որ բժիշկները մշտապես այնտեղ լինեն եւ փոխարինեն իրար»:
• «Շտապօգնության» տնօրեն. «Սասնա ծռերը» պատրաստ է բաց թողնել բուժաշխատողներին, եթե նրանց մոտ գա առողջապահության նախարարը եւ վիրաբույժների բրիգադ: 
• Ոստիկանությունն առողջապահության նախարար Արմեն Մուրադյանին թույլ չի տալիս մտնել գնդի տարածք:   
• Իրավապահ մարմինները ուղղաթիռից թռուցիկներ են տարածում գրավված ՊՊԾ-ի տարածքում:
• «Սասնա ծռեր» խմբի վիրավոր անդամ Արամ Մանուկյանը ձերբակալվում է:
• Բուժակ Դավիթ Տոնոյանը լքում է ՊՊԾ գունդը: Մնում է եւս երկու բժիշկ եւ բուժքույր: 
• Ոստիկանությունը փորձում է թույլ չտալ հանրահավաք անցացնել Խորենացու փողոցում (ֆոտոռեպորտաժ): Բերման են ենթարկվում տասնյակ քաղաքացիներ, այդ թվում` ռեժիսոր Ատոմ Էգոյանի կինը` հայտնի դերասանուհի Արսինե Խանջյանը: Ակտիվիստները պայմանավորվում են հուլիսի 28-ին հավաքվել «Ազատության» հրապարակում: 

Արսինե Խանջյան

Հուլիսի 28

• «Հիմնադիր խորհրդարանի» անդամ Ալեք Ենիգոմշյանը ձերբակալվում է խմբին աջակցության կասկածով:  
• «Ազատության» հրապարակում հորդառատ անձրեւի տակ ցույց է տեղի ունենում: Բախում չկա: 

Հուլիսի 29

• Ոստիկանություն. «Փոխհրաձգության ընթացքում հրազենային վնասվածք է ստացել խմբի անդամ Արայիկ Խանդոյանը: Նա հիվանդանոց չի տեղափոխվել»: Հրաձգությունը շարունակվում է, ինչի հետեւանքով վիրավորվում են խմբի անդամներ Արմեն Լամբարյանը եւ Արթուր Մելքոնյանը: Երկուսին էլ հիվանդանոց են հասցնում: 

Արայիկ Խանդոյան

Արմեն Լամբարյան

Արթուր Մելքոնյան

• «Ազատության» հրապարակում մեկնարկում է ցույցը: Այնուհետեւ մասնակիցներն ուղղվում են Սարի թաղ, որտեղ բախում է տեղի ունենումոստիկանության հետ: Ոստիկանները ցուցարարների ուղղությամբ ծխանռնակներ ու լուսաձայնային նռնակներ են նետում: Տարածքում հրդեհ է սկսվում: Միաժամանակ ոստիկանությունն ուժ է կիրառում նաեւ Խորենացու փողոցում եւ ցրում ցուցարարներին: 16-ամյա Սայադ Հարությունյանը զրկվում է աչքից, Թամար Մանուկյանի մաշկի 15-20 տոկոսն այրվում է: Դաժան ծեծի է ենթարկվում դասախոս, արաբագետ Մարատ Յավրումյանը: 
• Քաղաքացիական հագուստով մարդիկ խոչընդոտում են լրագրողների աշխատանքը, նրանց արգելում են նկարահանում կատարել, ծեծի են ենթարկում: 
• Քաղաքացիական հագուստով մարդիկ, որոնք որպես ոստիկան են ներկայանում, փորձում են ուժով հիվանդանոցից դուրս բերել «Ժառանգության» անդամ Դավիթ Սանասարյանին, որն անգիտակից վիճակում էր գտնվում: Հետագայում Սանասարյանին տեղափոխում են ոստիկանություն:
• Բերման է ենթարկվել 165 քաղաքացի:

Թամար Մանուկյան

Մարատ Յավրումյան

Սայադ Հարությունյան

Հուլիսի 30

• Սեֆիլյանը հայտարարությամբ է հանդես գալիս. «Սերժ Սարգսյանը չունի մտադրություն քաղաքական բանակցությունների միջոցով հանգուցալուծելու այս բարդ խնդիրը: Նա որոշել է ընտրել արյունալի ուղին եւ ջարդել ապստամբ տղաներին»:
• Ալեք Ենիգոմշյանը երկու ամսով կալանավորվում է: 
• Ոստիկանություն. ՊՊԾ-ի գնդից կրակոցի հետեւանքով զոհվել է 30-ամյա ոստիկան Յուրա Ստեփանոսյանը: Կրակոցի պահին նա մեքենայում է եղել:
• Ցույց «Ազատության» հրապարակում, որին հաջորդում է երթ դեպի Բաղրամյան պողոտա: Այստեղ քաղաքացի Քաջիկ Գրիգորյանը իր վրա բենզին է լցնում եւ այրում է: Նա հրաժարվում է ոստիկանական մեքենայով հիվանդանոց գնալ: Ցուցարարները նրան տաքսիով են ուղարկում: Հետագայում նա մահանում է հիվանդանոցում:

Յուրա Ստեփանոսյան

Քաջիկ Գրիգորյան

Հուլիսի 31

• Վարուժան Ավետիսյան. «Մենք չենք սպանել ոստիկանին»:
• «Սասնա ծռերը» Սերժ Սարգսյանին կոչ են անում Սեֆիլյանի հետ հանդիպում ապահովել:
• Ոստիկանություն. ՊՊԾ-ի գնդից կրակած «դիպուկահարի» ֆոտոն:

• Բժիշկը առողջապահության նախարարին է դիմում իրեն «Սասնա ծռերի» մոտթողնելու խնդրանքով:
• Խմբի անդամ Պավլիկ Մանուկյանը 2 ամսով կալանավորվում է: 
• ՊՊԾ գնդից հանում են «Սասնա ծռերի» 2 անդամի` Ռուբեն Գրիգորյանին եւ Գեւորգ Մելքոնյանին:
• Կրծքավանդակի շրջանում վիրավորվում է խմբի անդամ Սեդրակ Նազարյանը, նրան հիվանդանոց են հասցնում: 

Սեդրակ Նազարյան

• Ժիրայր Սեֆիլյանը իշխանությունների հետ բանակցությունների համար մի շարք պահանջներ է առաջ քաշում: 
• «Սասնա ծռերը» որոշում են կայացնում հանձնվել ոստիկանությանը. «Մենք ընդամենը կայծ ենք, հայ ժողովուրդը կշարունակի սկսվածը»:
• Հիվանդանոց են հասցվում խմբի վիրավոր անդամներ Գեւորգ Իրիցյանը եւ Արթուր Սարգսյանը: Արայիկ Խանդոյանը հրաժարվում է հիվանդանոց տեղափոխվելուց: 
•  Հանրահավաք Ազատության հրապարակում: 

Օգոստոսի 1

• Հետախուզման մեջ գտնվող «Հիմնադիր խորհրդարանի» նախագահ Գարեգին Չուքասզյան. «Սասնա ծռերի» շարժումը կղեկավարվի բանտից եւ ընդհատակից»։
• Երեւանում զինված խմբի գործով ձերբակալվել կամ կալանավորվել է 47 անձ:
• Սերժ Սարգսյան. «Լեռնային Ղարաբաղի խնդրի կարգավորման ճանապարհինմիակողմանի զիջումներ չեն լինելու: Լեռնային Ղարաբաղը երբեք չի լինելու Ադրբեջանի կազմում»:
• Սերժ Սարգսյան. «Ես ներողություն եմ խնդրում մեր լրագրողներից հուլիսի 29-ի՝ լույս 30-ի գիշերվա դեպքերի համար: Ձեր ներողամտությունը հայցելով՝ միայն լրագրողներին, բայց ոչ իրավապահներին, խնդրում եմ մոռանալ այդ դեպքերի մասին»:
• Հանրահավաք Ազատության հրապարակում:

Հաջորդ օրերին «Սասնա ծռերի» ձերբակալված անդամները հայտարարում են, որ իրենց պահում են անմարդկային պայմաններում: Ձեւավորվում է «Սասնա ծռերին» պաշտպանող փաստաբանների խումբ:http://news.am/arm/news/340144.html