Ազատության հրապարակում երթն ավարտվեց (ուղիղ միացում)

22:33

Երթն ավարտվեց Ազատության հրապարակում՝ վաղը կրկին հավաքվելու պայմանով:

22:06

Այս պահին երթի մասնակիցներ «Ազատ, անկախ Հայաստան», «Հեռացեք», «Սասնա ծռեր» վանկարկումներով շարժվում են Երևանի կենտրոնական փողոցներով:

21:40

Ազատության հրապարակում ավարտվեց հանրահավաքն ի աջակցություն «Սասնա ծռերի» և մեկնարկեց երթ Երևանի կենտրոնական փողոցներով: Հավաքավածները որոշեցին Հյուսիսային պողոտայով և Աբովյան փողոցով շարժվել դեպի Ամիրյան փողոց, որից հետո Մաշտոցի պողոտայով վերադառնալ Ազատության հրապարակ:

20:50

Ազատության հրապարակում հանրահավաքը մեկնարկեց.

Նշենք, որ արդեն մի քանի օր հանրահավաքը ընթանում է ինքնաբուխ: Հարթակ են բարձրանում տարբեր քաղաքացիներ և ներկայացնում իրենց մտահոգությունները՝ երկրում առկա խնդիրների առնչությամբ: Հավաքվածների թիվն այնքան էլ մեծ չէ:

20:24

Հիշեցնենք, որ Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց՝ պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Պատանդ վերցվածներն ազատ են արձակվել մեկ շաբաթվա ընթացքում, սակայն հուլիսի 27-ին նրանք կրկին պատանդ են վերցրել բուժօգնության հասած բուժաշխատողներին:

Հուլիսի 30-ին գնդի տարածքից դիպուկահարի կրակոցից զոհվել է ոստիկանության զորքերի ծառայող Յուրի Տեփանոսյանը:

Հուլիսի 31-ին զինված խմբի անդամները վայր են դրել զենքն ու հանձնվել:

Ուղիղ եթերը՝ 1in.am–ի և Ազատություն ռ/կ–ի