Սիրում եմ կնոջս նայել, երբ քնած է. Արման Նշանյանը ամուսնական նոր կյանքի և ծննդյան տարեդարձի մասին (լուսանկարներ)

Լife.tert.am-ը գրում է. 

Օրերս ցանկալի փեսացուներ շարքը լքած երգիչ-դերասան Արման Նշանյանն այսօր նշում է իր 38-րդ տարեդարձը: Տարեդարձի մանրամասների, նոր կարգավիճակի զգացումների, մեղրամսի և այլ մանրամասների մասին՝ զրույցում:

-Ինչպե՞ս սկսվեց այս տարվա տարեդարձը՝ արդեն ամուսնացած կարգավիճակում:

-Չափազանց յուրահատուկ տարեդարձ եմ ունեցել: Օգոստոսի 11-ի գիշերը Նավասարդն է: 4500 տարի առաջ Հայկը հաղթեց Բելին և հիմնեց նոր Հայաստանը: Ամեն տարվա այդ օրը ես գնում եմ Տաթևի վանք և այնտեղ դիմավորում Նավասարդը, իսկ հետո նաև տարեդարձս: Այս տարի խախտել եմ ավանդույթը, քանի որ մեկ ամսվա մեջ երկու անգամ գնացել էի վանք: Մեր հարսանիքի քավորի հետ ռեստորանում նշեցինք Նավասարդը, իսկ հետո մեզ միացան մեր մյուս ընկերները ու խնջույքը ավելի ակտիվացավ: Արդեն 00:01-ին մեր տանն էինք ու երկուսով նշեցինք տարեդարձս:

-Ինչպե՞ս շնորհավորեց Ձեր կինը։

-Հավատացեք, որ իր հետ նշելը արդեն նվեր է: Օրը դեռ առջևում է, բայց որպես նյութական անակնկալ դեռ չի եղել: Այս տարվա տարեդարձս հավանաբար ամենատպավորիչը կմնա ինձ համար:

-Երեկվա խնջույքով սահմանափակվելո՞ւ է ամեն ինչ, թե՞…

-Այսօր մեր նոր ընտանիքով ենք նշելու տարեդարձս: Շատ հյուրեր չեն լինելու՝  մեր մոտ ընկերը և երկուսիս ընտանիքները: Հաճելի երեկո է սպասվում մեծ ընտանիքում: Առանձնապես յուրահատուկ բաներ չենք մտածել: Հարսանիքը օրեր առաջ էր ու դեռ տպավորությունների մեջ ենք, մեծ խնջույք հաստատ չենք ուզում:

-Հավանաբար շուտով մեղրամսի կմեկնեք: Վայրն արդեն ընտրվա՞ծ է:

-Այո, իհարկե մեկնելու ենք: Թռիչքը մի քանի օրից է: Գնալու ենք Հնդկաստան: Վայրը համատեղ որոշեցինք: Երկուսս էլ հոգևոր արշավներ ենք սիրում, նույնատիպ վայրեր ընտրում: Հետո որոշել ենք, որ անպայման գնալու ենք Արևմտյան Հայաստանը տեսնելու:

-Հարցազրույցներից մեկում շատ գեղեցիկ նկարագրություն էիք տվել՝  ասելով, որ Վիկան փոխել է ձեր ԴՆԹ կոդը: Փոխված կոդով և ամուսնացած մարդու կարգավիճակում կկիսվե՞ք զգացումներով:

-Մենք իրար հետ ծանոթացել էինք երկնքում: Պարզապես անհրաժեշտ էր, որ հանդիպեինք իրար նաև նյութական աշխարհում: Ես սիրում եմ կնոջս նայել, երբ անգամ քնած է: Շատ հետաքրքրիր զգացողություն է, որը բառերով չի լինի նկարագրել: Ինձ կհասկանան, այն մարդիկ, ովքեր արդեն գտել են իրենց կեսին, իսկ ովքեր դեռ չեն գտել հաստատ ասելու են, որ հեքիաթներ եմ պատմում: Նման հարազատ զգացումից ավելի լավ բան չկա, երբ հասկանում ես, որ իզուր չէիր փնտրում:

 Լուսանկարները տրամադրեց Արման Նշանյանը

 Նյութը՝ Անահիտ Կասամանյան