Ադրբեջանը խոչընդոտում է սահմանին փոխվստահության մեխանիզմի ամրապնդման ջանքերին

ԼՂ հակամարտության կարգավորման համար կողմերն ու միջազգային հանրությունը հիմք են ընդունում Մադրիդյան վեց սկզբունքներն ու փորձում հարցը լուծել այդ շրջանակում, սակայն Ադրբեջանը հրապարակայնորեն հրաժարվում է ընդունել Մադրիդյան սկզբունքները եւ ոչ ճիշտ ձեւով մեկնաբանում դրանք: Ավելին, Ադրբեջանը ապակողմնորոշում է նաեւ միջազգային հանրությունը` բանակցությումների ընթացքը ներկայացնելով ոչ ճիշտ ձեւով: Գնահատականը ՀՀ արտաքին գործերի նախարարի տեղակալ Աշոտ Հովակիմյանինն է:

Երեւանում ՆԱՏՕ-ի խորհրդարանական վեհաժողովի ՌՈՈՒԶ ՌՈԹ սեմինարի ժամանակ Հովակիմյանը հիշեցրեց, որ ԵԱՀԿ ՄԽ համանախագահող երկրների առաջնորդները հինգ հայտարարություն են տարածել, որոնք Հայաստանը ողջունել է, Ադրբեջանը մերժել բոլոր սկզբունքները:

«Ադրբեջանը հրաժարվում է իրականացնել նաեւ սահմանին հետաքննական մեխանիզմի իրականացումը, նաեւ հրաժարվում է ետ քաշել դիպուկահարներին: Ի տարբերություն այդպիսի մոտեցման՝ Հայաստանը միշտ աջակցել է սահմանին փոխվստահության մթնոլորտի ամրապնդմանը՝ վստահ լինելով, որ այն կարող է նպաստել հակամարտության կարգավորմանը: Առանց փոխվստահության հնարավոր չէ լուծել հակամարտությունը»,- ասաց Հովակիմյանը` հավելելով, որ վերջին շրջանում հրադադարի ռեժիմի խախտման դեպքերը որակական ու քանակական առումով ավելացել են: «Դրանք հասել են աննախադեպ մակարդակի, քանի որ կիրառվում են ծանր զենք, դիվերսիա, հետախուզական ներթափանցում, քաղաքացիական բնակչության թիրախավորում եւ կրակոցներ բնակելի տարածքների ուղղությամբ»,- եզրափակեց Հովակիմյանը: