Պարզ միջոցներ՝ խռմփոցից ազատվելու համար

Խռմփոցն իրական խնդիր ու անհարմարություն է ինչպես հենց «խռմփացնողի», այնպես էլ նրա մոտակայքում քնածների համար: Խռմփոցից ազատվելու եղանակների մասին մեծ մասամբ հետաքրքրվում են ոչ թե գիշերները խռմփացնողները, այլ նրանք, ում այդ ձայները խանգարում են քնել, քանի որ քնած մարդն իր իսկ բարձրացրած աղմուկը չի նկատում, այն դեպքում, երբ կողքին քնածին դա կարող է մեծ անհարմարություն պատճառել:

Խռմփոցի հիմնական պատճառները

Քնի ժամանակ լեզվի և փափուկ քիմքի մկանները թուլանում են և խանգարում շնչառությանը, ինչն էլ հանգեցնում է խռմփոցի:

Հաճախ խռմփոցը նկատվում է տղամարդկանց, ինչպես նաև ծխողների և ավելորդ քաշ ունեցողների մոտ:

Նշիկագեղձերը նույնպես կարող են քնի ընթացքում խանգարել շնչառությանը: Բացի այդ, այն կարող է պայմանավորված լինել մեծ ադենոիդներով, միջնապատի կորությամբ, քթի խոռոչի պոլիպներով, վնասվածքներով և այլն:

Մարդը կարող է սկսել խռմփացնել նաև ալկոհոլ ընունելու, գերհոգնածության կամ քաշի ավելացման դեպքում:

Խռմփոցի արդյունավետ բուժում

Այսօր կան բավական շատ միջոցներ, որոնք օգնում են ազատվել այս խնդրից, սակայն դրա առաջացման պատճառները պարզելու համար անհրաժեշտ է դիմել համապատասխան մասնագետի օգնությանը (օտորինոլարինգոլոգ կամ սոմնոլոգ), ով կնշանակի բուժումը՝ կախված ստուգման արդյունքներից:

Սակայն կա մի քանի պարզ միջոց, որոնց օգնությամբ կարելի է արդյունավետ կերպով ազատվել խռմփոցից տնային պայմաններում:

1.      Փոխել ապրելակերպը. խռմփոցից ազատվելու համար պետք է ոչ միայն ինչ-որ բան անել, այլև ինչ-որ բան չանել: Օրինակ՝ շատ կարևոր է ալկոհոլից ու ծխախոտից հրաժարվելը:

2.      Ազատվել ավելորդ քաշից. եթե խռմփոցի պայմանավորված է ավելորդ քաշով, ապա գիշերվա «աղմուկից» կարելի է ազատվել պարզապես նիհարելով: Այս հարցում կօգնեն սպորտն ու ճիշտ ընտրված դիետաները: Անհրաժեշտ է ուտել հնարավորինս շատ թարմ մրգեր ու բանջարեղեն և ավելի քիչ տապակած ու ճարպոտ սնունդ:

3.      Քնի դիրքը. ամենից հաճախ խռմփացնում են մեջքի վրա քնող մարդիկ, ուստի հարկավոր է փոխել քնի դիրքը: Շատ լավ տարբերակ է կողքի քնելը: Այս դիրքը կօգնի ազատվել աղմկոտ շնչառությունից, իսկ կրկին մեջքի վրա չպառկելու համար կարելի է մեջքի ետևում դնել թենիսի գնդակ: Շատ կարևոր է նաև, որ իրանի հատվածը մի փոքր ավելի բարձր դիրքում լինի, ինչը թույլ չի տա, որ լեզուն շատ ետ գնա: Բացի այդ, երբ հեղուկը իջնում է մարմնի ստորին հատված, քիթ-կոկորդի լորձաթաղանթն ավելի քիչ է այտուցվում, ինչը հեշտացնում է շնչառությունը:

4.      Վարժություններ. տնային պայմաններում խռմփոցը բուժելու համար խորհուրդ է տրվում կատարել հատուկ ֆիզիկական վարժություններ:

  Լեզուն հնարավորինս դուրս հանել, ձգել ներքև և այդ դիրքում պահել մի քանի վայրկյան: Այս վարժությունն ամրապնդում է լեզվի մկանները: Այն անհրաժեշտ է կատարել օրական մի քանի ամգամ՝ 30 անգամ կրկնելով:

 Ձեռքով սեղմել ծնոտին և պահել ծնոտն այնպես, որ այն առաջ ու ետ տանելիս մի փոքր դիմադրություն լինի: Կատարել այս վարժությունը օրական 2 անգամ քսանական անգամ:

 Բացել բերանը և ստորին ծնոտով կատարել 10 շրջանաձև շարժում՝ սկզբում սլաքի ուղղությամբ, իսկ այնուհետև՝ հակառակ:

 20-25 անգամ բարձրաձայն արտաբերել «ի» և «ու» հնչյունները՝ լարելով պարանոցի մկանները: