Ամեն առաջարկ չեմ ընդունում. Սոնա Շահգելդյանը անձնական բիզնեսի և նոր ֆիլմում նկարահանվելու մասին (լուսանկարներ)

Life.tert.am-ը գրում է . 

Tert.am Life-ի ունեցած հավաստի տեղեկություններով երգչուհի Սոնա Շահգելդյանը նկարահանվել է նոր գեղարվեստական ֆիլմում: Տեղեկությունը հաստատելու համար զրուցեցինք երգչուհու հետ: Մանրամասները՝ զրույցում: 

-Պարզվում  է, որ գեղարվեստական ֆիլմում  նկարահանվելու երրորդ փորձն եք արել: Ի՞նչ ֆիլմի մասին է խոսքը:

- Առաջին անգամ Հանրային հեռուստաընկերության նկարահանած «Մոխրոտիկ» գեղարվեստական ֆիլմն էր, որը շատ էի սիրել: Հետո հաջորդեց «Հյուսիս-Հարավ»-ը, իսկ հիմա էլ այս նոր առաջարկը: Նկարահանվել եմ Մկրտիչ Արզումանյանի նոր ֆիլմում: Շատ մեծ սիրով եմ առաջարկն ընդունել և կերպարը հասկանալուց հետո համաձայնել եմ:

-Ինչպիսի՞  կերպար եք մարմնավորել:

-Էպիզոդիկ կերպար եմ մարմնավորել: Գլխավոր հերոսը Մկոն է: Շատ տեղեկություն ֆիլմի մասին ասել  չեմ կարող, քանի որ դեռ կազմակերպիչները տեղեություն չեն տարածում:

-Ի՞նչ ժանրի է լինելու ֆիլմը:

-Կոմեդիա է: Պետք է ասեմ, որ մարդկանց ծիծաղեցնելը դա շատ դժվար գործ է ու շատ աշխատանք ու պրոֆեսիոնալիզմ է պահանջում:

-Ովքե՞ր են այս ֆիլմի Ձեր խաղընկերները:

-ւիզայի Ներսիսյան ու Մկոն: Շատ հայտնի դեմքեր էլ են լինելու, բայց էլի փակագծերը բացել չեմ կարող:

-Ներկայանում եք նաև «Դոմինո»  սիթքոմում: Նոր եթերաշրջանի սպասի՞ հեռոուստադիտողը:

-Միանշանակ թող սպասի, քանի որ նոր եթերաշրջան լինելու է: Սցենարական զարգացումների մասին դեռ ոչինչ ասել չեմ կարող, քանի որ ես ինքս դեռ սցենարին ծանոթ չեմ:

-Նկարահնվել եք գեղարվեստական ֆիլմում, սիթքոմում, տեսահոլովակներով ու համերգներով եք պարբերաբար էկրանին երևում: Ճիշտ եք համարում, որ երգչուհին էկրանին շատ է հայտնվում:

-Ես երգչուհու, այն կերպարը չեմ, որ ամեն պատահած առաջարկ ընդունում է ու անտեղի հայտնվում էկրանին: Մինչև առաջարկը չեմ քննարկում ու հասկանում որքանով կարող եմ իրականացնել, չեմ համաձայնում: Ֆիլմերի առաջարկներ շատ հաճախ եմ ստանում, բայց հենց չձանձրացնելու փաստը հաշվի առնելով ամեն տեղ չեմ համաձայնում: Պետք է կարողանալ հետաքրքիր լինել:

-Իսկ հնարավո՞ր է, որ շուտով հեռուստադիտողը Ձեզ սկսի ընկալել որպես դերասանի, այլ ոչ երգչուհու:

-Ոչ մի դեպքում, քանի որ ես չեմ պատրաստվում թողնել երգարվեստը: Շատ սիրել եմ դերասանի աշխատանքը, սակայն դա միշտ կմնա զուգահեռ մի բան, բայց երգը միշտ կլինի առաջին հորիզոնականում:

-Իսկ ի՞նչ նորություններ սպասել երգչուհի Սոնա Շահգելդյանից:

-Բալիկիս հետ գեղեցիկ ֆոտոշարք ունեմ, որը շուտով կտեսնեն մարդիկ: Տարբեր ոճերի նոր երգեր եմ պատրաստել, որը շուտով կլսեն: Աշնանը կլինի նոր տեսահոլովակ: Համերգային շրջագայություն ունեմ Բրյուսելում և Մոսկվայում:

-Ասում են, որ նոր բիզնես եք սկսում: Ինչի՞ մասին է խոսքը:

-Այո, կա նման բան: Ներկայացնելու եմ սեփական բրենդ: Բրենդը կկրի հենց իմ անունն ու ազգանունը: Դա մի յուրօրինակ իր է լինելու, որը Հայաստանում դեռ չկա, բայց արտերկրից գողացված գաղափար էլ չի: Սրա փակագծերը ևս չեմ բացելու, սակայն կասեմ, որ շատ տարբերվող բրենդ է լինելու ու հաստատ շատերի կողմից հավանության է առժանանալու:

-Շահութաբեր կլինի բիզնեսը, ի՞նչ եք կարծում:

-Բիզնեսս  բավականին փոքր է լինելու ու շահույթի մասին առանձնապես մեծ ակնկալիքներ չունեմ: Հայաստանում նմանատիպ բիզնեսից մեծ գումարներ չի լինի: Այլ հարց, եթե խոսեինք արտասահամանի մասին:

-Հնարավո՞ր է, որ այլ երկիր տեղափոխվելու ցանկություն ունենաք:

-Չնայած այն փաստին, որ ընդունում եմ, որ Հայաստանում ամեն ինչ այդքան էլ հեշտ չէ, բայց մեկնել հայրենիքից  չեմ պատրաստվում, սակայն մեկնողներին էլ չեմ մեղադրում: Ամեն մարդ ինքն է որոշում իր անելիքը: Կարողանում եմ իմ քրտինքով ապրել ու շատ բան հասցնել ու բողոքներ չունեմ:

-Ինչպես հասկացանք բազմազբաղ եք: Ինչպե՞ս եք կարողանում համատեղել և ժամանակ գտնել որդու համար:

-Ամուսինս աշխատում է պետական համակարգում և ինքն էլ չի կարող օգնել ինձ տանը: Ինձ մայրս է շատ օգնում և առանց նրա հաստատ չէի հասցնի: Բալիսկիս կարողանում եմ խնամել ու տնային գործերից հասկանում եմ:

 Հարցազրույցը՝ Անահիտ Կասամանյանի