Սա պայքար է և միայն «Ժառանգության» խնդիրը չէ. Րաֆֆի Հովհաննիսյան

Tert.am-ը գրում է.

«Ժառանգություն» կուսակցության ղեկավար Րաֆֆի Հովհաննիսյանը Tert.am-ի հետ զրույցում ասում է, թե հայ ժողովուրդը միասնական օրակարգ պետք է ունենա և չտարանջատի ՀՀ-ի ինքնիշխանության և Արևմտյան Հայաստանում հայոց իրավունքների վերականգնման հրամայականը:

Կուսակցության առաջնորդը հաստատեց տեղեկությունը, որ մի քանի օր առաջ է վերաադաձել ԱՄՆ-ից և Արևմտյան Հայաստանից, իսկ գնացել էր պապական հայրենիք՝ մասնավոր այցով:

«Մեր հայրենիքի արևմտյան հատվածից և ԱՄՆ-ից մի քանի օր առաջ եմ վերադարձել, ուր այցելել եմ մասնավոր առաքելությամբ՝ ապրիլի 24-ի Հայոց ցեղասպանության 100-րդ տարելիցի հետքերով, գնացել եմ իմ պապենական և տատենական գյուղերը և վերադարձել եմ, և համարում եմ, որ հայ ազգը, հայ ժողովուրդը պետք է ունենա միասնական օրակարգ, որը չի կարելի բաժանել և այդ օրակարգում կա ՀՀ-ի ինքնիշխանության, ազատության, ժողովրդավարության խնդիրը, ինչպես նաև Արևմտահայաստանում հայոց իրավունքների վերականգնման հրամայականը և մեկը մյուսին չի խաչաձևում»,-ասաց նա:

Րաֆֆի Հովհանիսյանն ընդգծեց, որ Հայաստանում շարունակելու է ակտիվ մասնակցություն ունենալ բոլոր հարցերում: «Ես չեմ զանազանում կամ չեմ ընդունում քաղաքական կամ հայաստանյան սահմանները: Ես գտնում եմ, որ մենք ունենք գործ անելու թե այս կողմ առաջին հերթին, թե սահմանից այն կողմ. մեկը մյուսին չի կարող խանգարել կամ գերակայել»,-նշեց նա:

Խոսելով ներքին խնդիրներից և առաջիկայում սպասվող սահմանադրական բարեփոխումներից, Րաֆֆի Հովհաննիսյանը նկատեց, թե դրանք «թվացյալ բարեփոխումներ են»:

«Ուղղակի բարեփոխման նմանակում են կամ իմիտացիա, որպեսզի այս վարչակարգը շարունակի այլ ծածկույթով իր գործունեությունը, դրա համար մենք շատ հստակ ասել ենք, ներկայացրել ենք մեր պայմանները, պահանջները, որի հիման վրա մենք նպատակահարմար կհամարենք անգամ չընդունելով այս իշխանության լեգիտիմությունը՝ քննարկելու այդ թվացյալ փոփոխությունները: Դրանք հրապարակային են, իրենց ուղարկածն են, և մեզ համար խնդիր չէ չհրավիրվելը»,-ասաց նա:

Կուսակցության ղեկավարը, ով նաև մասնակցում էր էլեկտրաէներգիայի թանկացման դեմ ակցիային, նշեց, որ ինչպես միշտ այս անգամ էլ ինքը ներկա է որպես «շարքային, իրավատեր, խոնարհ» քաղաքացի:

«Այս հարցերը վերաբերում են բոլորին, որը մի քանի կոպեկի խնդիր չէ, այլ համապետական, համազգային նշանակության արդարության և արժանապատվության խնդիր է»,- ասաց նա:

Հարցին, թե չի՞ կարծում, որ քաղաքական ուժերի անգործության հետևանքով քաղաքացիական ուժերն են ստիպված նախաձեռնությունը վերցրել իրենց ձեռքը, Րաֆֆի Հովհաննիսյանը պատասխանեց, թե ինքն այդ ուժերի միջև որպես այդպիսին տարբերություն չի դնում:

«Ես տարբերություն չեմ գտնում այդ պայքարների միջև, համարում եմ դրանք միևնույն պայքարն է, ամեն մեկը կարող է ունենալ իր նախընտրությունը, և ի վերջո քաղաքական պայքարն ու քաղաքացիական պահանջը մեկը մյուսին են սպասարկում և մեր հաջողության գրավականը երբ էլ արդյունք արձանագրի՝ կլինի քաղաքական և քաղաքացիական արհեստական ջրբաժանման վերացման արդյունքում և դրա համար ես կարծում եմ, որ իսկապես կապ չունի, ես կարող եմ ասել, որ ներկայանում եմ որպես շարքային քաղաքացի և միաժամանակ քաղաքական կուսակցության ներկայացուցիչ ես որևէ հակասություն չեմ տեսնում»,-ասաց նա:

Իսկ, թե «Ժառանգությունը» որպես կուսակցություն արդյո՞ք չի թուլացել հարցին Հովհաննիսյանը հակադարձեց, թե ինքն այդպես չի կարծում:

«Մենք մեր պատասխանը գործով արել ենք, կարճ պատասխանն այն է, որ ոչ, սա պայքար է և միայն «Ժառանգության» խնդիրը չէ, ոչ էլ իմ խնդիրն է, ուժեղ կամ թույլ երևալ, մենք այստեղ ենք, եղել ենք հրապարակում և կապ չունի թե ով է հրավիրում, ով է նախաձեռնում, եթե հայոց իրավունքը նախաձեռնված է, դա լինի պետական, ազգային, քաղաքացիական, և այնտեղ ոչ մի թուլություն չկա: Դա մեր ուժն է, որ մենք ունենք համեստությունը, որ ներկա լինել և պայքարել որպես շարքային քաղաքացի»,-նշեց նա: