Փորձում ենք դրդել Թուրքիային բացել սահմանը, քանի որ շրջափակման մեջ եղող ՀՀ-ն ներդրումների համար բարենպաստ չէ. Մ. Փամոկջյան

Tert.am-ը գրում է.

Ֆրանսիական «Ֆինեկոյի» գիտական խորհրդատու և հիմնադիր Մանուկ Մանուել Փամոկջյանը Tert.am-ի հետ զրույցում ասաց, որ Հայաստանը ներդրումների համար այնքան էլ բարենպաստ չէ ավելի շատ օբյեկտիվ, քան սուբյեկտիվ պատճառներով։

«Առաջին պատճառն այն է, որ Հայաստանը շրջափակման մեջ գտնվող երկիր է և հենց այդ պատճառով է, որ ես համագործակցում եմ Թուրքիայում քաղաքացիական հասարակության հետ, տարբեր միջազգային փորձագետների հետ, որպեսզի դրդենք Թուրքիային բացել սահմանը»,- ասաց նա և նշեց, որ շրջափակման մեջ գտնվող երկիրը տնտեսական առումով չի կարող զարգանալ։

Երկրորդ պատճառը նա համարեց ներքին քաղաքական վիճակը, որը բնորոշվում է օլիգարխիկ և մենաշնորհային տերմիններով։ «Այսինքն՝ պետության կառավարման ձևը դեռևս բավականաչափ երաշխիքներ չի տալիս ժողովրդավարության տեսակետից, որպեսզի արտասահմանյան ներդրողները ցանկություն ունենան և կարողանան այստեղ ներդրումներ անել։ Երրորդ խնդիրը Ռուսաստանի հետ տնտեսական առումով չափազանց սերտ կապերն են, ինչի հետևանքով, եթե Ռուսաստանի շուկան կամ տնտեսությունը վատ է ընթանում, Հայաստանն ինքնաբերաբար հայտնվում է նույն վիճակում, ինչը նույնպես արտասահմանցի ներդրողին վստահություն չի ներշնչում, որպեսզի նա ներդրումներ կատարի»,- ասաց նա։

Մանուկ Մանուել Փամոկջյանը մտահոգիչ համարեց նաև Հայաստանից արտագաղթի խնդիրը, հատկապես երիտասարդների, ովքեր ունեն բավարար կրթություն, սակայն չեն մնում երկրում, ինչը արտասահմանյան ներդրողի համար բացասական հատկանիշ է և վստահություն չի ներշնչում։

«Ամեն դեպքում ներդրումների պակասը մեծապես պայմանավորված է երկրում քաղաքական իրավիճակով, դեմոկրատական բարեփոխումներով»,- ասաց նա և նկատեց, որ 2008 թվականի մարտի 1-ից հետո սփյուռքի համայնքների կողմից ներդրումների իրականացման բնագավառում նկատվում է հետընթաց։