«Հայկը սիրում է իմ խենթ բնավորությունը». Արփինե Կոշտոյանը` իր նշանադրության մասին (լուսանկարներ)

Life.panorama.am-ը գրում է . 

Օրեր առաջ` օգոստոսի 30-ին, տեղի է ունեցել դիզայներ Արփինե Կոշտոյանի և նրա սիրելիի` Հայկի,  նշանադրության արարողությունը: Այս առիթով Life.panorama.am-ը կապ հաստատեց դիզայների հետ` ճշտելու նշանադրության մանրամասների և նրա զգացողությունների մասին:

«Մի գեղեցիկ օր Հայկն ինձ սիրո առաջարկություն արեց, ես էլ չմերժեցի»,- նշեց Արփինեն` պատմելով, որ նշանադրվելու որոշումն իրենք անսպասելի են կայացրել:

«Օգոստոսի 30-ին լրացավ նաև մեր ընկերության երկու տարին: Առհասարակ, մենք երկուսով ոչինչ նախօրոք չենք պլանավորում, մեզ մոտ ամեն ինչ իր հունով է ընթանում»,- մանրամասնեց դիզայները` ավելացնելով, որ իր և Հայկի նշանադրությանը ներկա են գտնվել միայն իրենց ամենամտերիմ հարազատները.

«Սրահում, որը որ ընտրվել էր նշանադրությունն անցկացնելու համար,  ելույթ էին ունենում իմ ընկերները: Արդյունքում, ստացվեց այնպես, որ այդ օրը մեր կողքին գտնվեցին բոլոր մեզ հարազատ մարդիկ,- պատմեց Արփինե Կոշտոյանը:

Խոսելով Հայկի մասին` Արփինեն պատմեց, որ հենց ի սկզբանե Հայկի մեջ գնահատել և սիրել է նրա լրջությունն ու խելացիությունը: Թեև նրանք տարբեր մասնագիտությունների տեր մարդիկ են, դա չի խանգարում, որպեսզի Արփինեն  և Հայկը լրացնեն միմյանց.

«Մենք այնքան տարբեր ենք մասնագիտություններով, ես արվեստի մարդ եմ, իսկ նա գիտական. Հայկն իր ոլորտում համարվում է ավագ ինժեներ, ինչպես նաև գիտությունների թեկնածու: Լինելով շատ տարբեր, բայց միևնույն ժամանակ նաև շատ նման, մեզ հաջողվում է լրացնել միմյանց:  Մենք նույնիսկ միանման ենք մտածում: Հայկն իմ մեջ սիրում է իմ խենթ բնավորությունը և այն, թե որքան տարբեր կարող եմ ես լինել տանը և աշխատավայրում,- մեզ հետ զրույցում նշեց Արփինե Կոշտոյանը:

Խոսելով նաև Հայկի` հայտնի հարսնացու ունենալու փաստից, Արփինեն ասաց. «Իհարկե, հաճելի է ունենալ հարսնացու, ով ունի իր սիրելի գործը, չէ որ սիրելի գործ ունեցող մարդիկ երջանիկ մարդիկ են»:

Զրույցի վերջում անդրադռանալով մոտ ապագայում իրենց հարաբերությունները օրինականացնելուն` դիզայները հստակեցրեց, որ դեռևս ամուսնություն չեն նախատեսում.

«Ես չեմ սիրում, երբ որևէ առիթ մարդիկ դարձնում են իրենց կենսակերպը, ինչից ելնելով` նրանք ուղիղ մեկ տարի պատրաստվում են այդ առիթին: Օրինակ, երբ ես և Հայկը որոշեցինք նշանադրվել, կարողացանք ընդամենը երեք օրում կազմակերպել գեղեցիկ նշանադրություն: Այնպես որ, ինչպես անսպասելի նշանադրվեցինք, գուցե այդպես անսպասելի էլ ամուսնանանք»,- Life.panorama.am-ի հետ զրույցում իր խոսքը եզրափակեց դիզայներ Արփինե Կոշտոյանը:

Հեղինակ` Անուշիկ Մելքոնյան