ՀՀԿ-ն քննարկում է Կարեն Կարապետյանի հարցը, այլ թեկնածուներ չկան. Արտակ Զաքարյան
Նախորդ ժամանակահատվածի համար կառավարության գործունեությունը պետք է գնահատել բավարար: Այս մասին այսօր՝ սեպտեմբերի 8-ին, ՀՀԿ խորհրդի նիստից առաջ լրագրողների հետ զրույցում ասաց ՀՀ Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը:
«Նոր մարտահրավերների պայմաններում արդեն նոր ձեւավորվելիք կառավարությունը պետք է հաշվի առնի բոլոր հնարավոր մարտահրավերները եւ մեր հասարակության պահանջները, որոնք, բնականաբար, կյանքի առաջընթացի հետ մեկտեղ փոխվում են: Մենք նաեւ պետք է նոր կառավարությանը պատրաստենք այդ նոր լուծումներին»,- ասաց Արտակ Զաքարյանը:
Արտակ Զաքարյանի խոսքով՝ ազգային համաձայնության կառավարությունը հանրության բոլոր շերտերի, խավերի պահանջները իր մեջ պարունակող եւ դրանց համար ծրագրեր նախատեսող կառավարություն պետք է լինի:
«Կարծում եմ՝ մենք կունենանք այդպիսի մոդելի կառավարություն ապագայում»,- նշեց նա:
Արտակ Զաքարյանը նշեց, որ այսօր հրավիրված խորհրդի եւ գործադիր մարմնի նիստերում նախատեսվում է քննարկել նոր վարչապետի պաշտոնում Կարեն Կարապետյանի թեկնածության հարցը: Այլ թեկնածուներ չկան, միայն Կարապետյանն է, նշեց Զաքարյանը։
Լրագրողների հարցին, թե Կարապետյանը հանրապետական կուսակցությունից չէ, դա չի՞ խանգարում, Զաքարյանը պատասխանեց. «Նա եղել է ավագանու ցուցակում, երկար տարիներ մեր կուսակցության հետ համագործակցել է: Գիտեք, որ հանրապետական կուսակցությունը կուսակցամոլությամբ չի զբաղվում եւ միշտ կարողացել է համախոհների եւ իր հետ համագործակցողների հետ երկար ճանապարհ անցնել»:
Ժամանակավոր վարչապետ ունենալու կարիքը Արտակ Զաքարյանը բացատրեց ստեղծված իրավիճակով: «Կառավարության փոփոխությունը հենված է հանրության կողմից նոր լուծումների, մոտեցումների անհրաժեշտությամբ: Հասարակությունը նոր մոտեցումների, նոր լուծումների անհրաժշտություն ունի: Հին կառավարությունն ունի գործունեության ծրագիր, որը պետք է թարմացվի, վերանայվի եւ համապատասխանեցվի ժամանակակից արտաքին եւ ներքին քաղաքական, հանրային պահանջներին»,- ասաց նա:
1
2
3
4
5
3
4
5
2
3
4
5
