Սրանով Սերժ Սարգսյանը ՀՀԿ-ականներին ասաց՝ ձեր մեջ մի կարգին մարդ չկա. Հայրիկյան

Հովիկ Աբրահամյանը չկարողացավ որեւէ կերպ մեղմել մեզ համար ճակատագրական ժողովրդագրական բացասական գործընթացը եւ սահմանադրության հանրաքվեի կեղծումը: Այս մասին, այսօր՝ սեպտեմբերի 9-ին, լրագրողների հետ հանդիպման ժամանակ նշել է ԱԻՄ ղեկավար Պարույր Հայրիկյանը:

Դիտարկմանը, թե Հովիկ Աբրահամյանը հայտարարել է, թե բաց ճակատով է հեռանում, Հայրիկյանն արձագանքեց. «Եթե ինքը գոհ է, որ իր վարչապետության ընթացքում մարդու իրավունքների կոպտագույն զանգվածային խախտում տեղի ունեցավ, կեղծվեց սահմանադրության հանրաքվեն, 32 տոկոս կողմը դարձել է 62 տոկոս կողմ, մինչդեռ 70 տոկոսը դեմ էր…: Էլ չեմ խոսում սոցիալ-տնտեսական վիճակի մասին: Հովիկ Աբրահամյանը չկարողացավ որեւէ կերպ մեղմել մեզ համար ճակատագրական այդ գործընթացները: Առաջին՝ ժողովրդագրական բացասական գործընթացները, եւ երկրորդ՝ հիմնական օրենքի կեղծումը:

Ես գիտեմ, որ Հովիկ Աբրահամյանը եւ ցանկացած պաշտոնյա Պուտինի կամակատարի կամակատարն է, բայց նա կարող էր լավ տեսք ընդունել՝ասելով, որ քանի որ իմ ժամանակ կեղծվաց հիմնական օրենքը, ես դա հանդուրժել չէի կարող»:

Անդրադառնալով Կարեն Կարապետյանին վարչապետի պաշտոնում ներկայացնելուն, ԱԻՄ առաջնորդն ասաց. «Հիմա էլ Պուտինն իր մարդուն է ուղարկել: Ուրեմն ՀՀԿ-ի ներսում մարդ չկա՞ր: ՀՀԿ-ն ստեղծել իմ ընկերը՝ Աշոտ Նավասարդյանը: Այն ստեղծվել է ԱԻՄ-ի հիման վրա: Չլիներ Աշոտ Նավասարդյանը ԱԻՄ-ի խորհրդում, իր կողմից մարդ էլ չէր լինի, որ նա հիմք ունենար կուսակցություն ստեղծելու: Ես արտասահմանում էի, առաջինը նա ինձ է զանգել ու ասել, որ ուզում է Հանրապետական կուսակցություն ստեղծել: Ասացի՝ ինչ ուզում ես ասա, մի քիչ դառնացած էի: Ու հիմա ՀՀԿ-ից հեռու մարդուն վարչապետ նշանակելով Սերժ Սարգսյանն ասաց՝ հանրապետականներ, դուք համբալներ եք, ձեր մեջ մի կարգին մարդ չկա, դրա համար ես կողքից եմ մարդ բերում: Սա ամենածանր ապտակն էր բոլոր հանրապետականներին: Սրանով ՀՀԿ-ն ընդունեց իր սնանկությունը»: