Նկարչությունների դուռը փակված է, Մուկուչյանը դրվել է հստակ խաղի կանոնների մեջ․ Ռուստամյան

Կենտրոնական ընտրական հանձնաժողովում ընտրության արդյունքների նկարչությունների դուռը փակված է, ԿԸՀ նախագահ Տիգրան Մուկուչյանը դրվել է հստակ խաղի կանոնների մեջ։ Այս մասին NEWS.am-ի հետ զրույցում ասաց ՀՅԴ խմբակցության ղեկավար Արմեն Ռուստամյանը՝ պատասխանելով հարցին, թե ինչու են սատարում տարիներ շարունակ ընտրությունների արդյունքները կեղծելու մեջ մեղադրվող Տիգրան Մուկուչյանին եւ ԿԸՀ-ի մյուս անդամների թեկնածությունը, որոնք նախօրեին առաջադրվել են ԱԺ պետաիրավական հանձնաժողովում։

«Մենք պաշտպանել ենք ԿԸՀ նախագահի եւ ներկայացված մյուս անդամների թեկնածությունը, քանի որ նրանք աշխատել են այս ընտրական օրենսգրքի վրա եւ տիրապետում են այս ընտրական օրենսգրքին։  Կտրուկ փոփոխությունը կարող է ճիշտ տեղ չտանել, քանի որ այնքան նոր մեխանիզմներ կան այս ընտրական օրենսգրքի մեջ»,-ասաց նա:

Ռուստամյանը վստահեցրեց, որ նոր Ընտրական օրենսգրքով փոխվել են խաղի կանոնները, կա կոնկրետ վերահսկողություն, որը ԿԸՀ նույն կազմին հնարավորություն չի տա գործելու նախկին կանոնների տրամաբանության շրջանակում։

«Արդեն նկարչությունների դուռը փակված է Մուկուչյանը դրվել է հստակ խաղի կանոնների մեջ։ Մուկուչյանը մի բան էր ուրիշ խաղի կանոնների մեջ, բոլորովին այլ բան է այս խաղի կանոնների մեջ։ Մեզ համար կարեւոր է, որ կես խոսքից իրար հասկանանք, այս նորարարությունների ծավալը պիտի կարողանանք  ամբողջությամբ հասցնել ընտրողին, սա լուրջ հարց է, մեծ է այդ փոփոխությունների ծավալը։ Միեւնույն է նրանք նախորդ կարգերի տրամաբանությամբ չեն կարող աշխատել, վերահսկողությունը մեծ է լինելու, իրենք ուզեն թե չէ անելու են այն, ինչն այսօր  քաղաքական ուժերի պահանջն է»,-ասաց Ռուստամյանը։

Հիշեցնենք, որ նախօրեին ԱԺ պետաիրավական հանձնաժողովում 3/5-ով ԿԸՀ նախագահի պաշտոնի համար առաջարկվել է Տիգրան Մուկուչյանի թեկնածությունը: Նրա թեկնածությանը կողմ են քվեարկել ՀՀԿ-ի, ՀՅԴ-ի, ՕԵԿ-ի ու ԲՀԿ-ի ներկայացուցիչները: