Ես երբևէ չեմ ձգտել և չեմ ասել, որ լավ քաղաքական գործիչ եմ. Ինչու՞ են սրված վարչապետի և Արծվիկ Մինասյանի հարաբերությունները

ՀՀ վարչապետ Կարեն Կարապետյանի և Էկոնոմիկայի նախարարի պաշտոնակատար Արծվիկ Մինասյանի հարաբերությունները փոքր ինչ սրված են: Սա ակնառու դարձավ հատկապես վերջին կառավարության նիստի ժամանակ, երբ Մինասյանը ներկայացնում էր ներդրումային ծրագրի շրջանակներում «Շանթ» ՍՊԸ կողմից ապրանքների ներմուծման դեպքում մաքսային և հարկային մարմինների կողմից հաշվարկված ԱԱՀ գումարների վճարման ժամկետը երեք տարի ժամկետով հետաձգելու մասին հարցը, վարչապետ Կարեն Կարապետյանը որոշ դիտողություններ արեց:

«Տալով արտոնություններ բիզնեսին՝ հետո այդ հարցը որևիցե ձև մոնիթորինգ չի՞ արվելու: ՊԵԿ-ի հետ պայմանավորվեք՝ հաշվետվության ձև արեք, թե ինչքան աշխատատեղ է ստեղծվում: Որքա՞ն ժամանակ է դիմել այդ արտոնությունների համար»,- նախարարից հետաքրքրվեց վարչապետը: «Մեկ շաբաթ»,- պատասխանեց Արծվիկ Մինասյանը: «Չեմ հավատում»,- արձագանքեց Կարեն Կարապետյանն՝ ավելացնելով. «Բա ինչո՞ւ չգիտեք, պարոն Մինասյան: Բիզնեսին աջակցող նախարարություն եք, դուք պետք է իրենց ձեռքը բռնած բոլոր կառույցներով գնաք, որ իրանք իրանց ապահով զգան, որ որևէ մեկն իրենց չխոչընդոտի: 1.5 մլն դրամ արտոնություն է խնդրում, երևի մի յոթ ամիս նամակագրություն է գրել, մենք պետք է էդ ամեն ինչը դասակարգենք, որ բյուրոկրատիան վերացնենք: Կա խաղի կանոն, հայտարարում ենք՝ ով այս խաղի կանոնի տակ է, համապատասխան նախարարությունն արտոնությունը տալիս է, բերում է էստեղ: Պետք է լինի ձևակերպված խաղի կանոն, թե որի դեպքում ենք մենք տալիս արտոնություն: Մնացած առանձին դեպքերը հատուկ կնայենք»,- ասել էր Կարեն Կարապետյանը:

Կարապետյանի վերաբերմունքը Մինասյանի նկատմամբ այնքան էլ բարի դրացիական չէ, քանի որ 2011թ.-ի Երևանի քաղաքապետի պաշտոնում առաջադրված ՀՅԴ-ական Արծվիկ Մինասյանը ասուլիսի ժամանակ հայտարարել էր. «Կարեն Կարապետյանը լավ մենեջեր է, բայց վատ քաղաքական գործիչ»:

Մինասյանն այդ ժամանակ խոսել էր փողոցային առևտրի վերացման,  կրպակների ապամոնտաժման մասին, ասելով, որ այս որոշումները լուրջ վնաս են հասցնում փոքր և միջին բիզնեսի ներկայացուցիչներին:

Կարապետյանն ի պատասխան Մինասյանի՝ Ազատություն ռադիոկայանին տրված հարցազրույցում ասել էր. «Ես երբևէ չեմ ձգտել և չեմ ասել, որ լավ քաղաքական գործիչ եմ: Եվ ընդհանրապես չեմ համարում, որ քաղաքապետը պետք է լինի լավ քաղաքական գործիչ: Այո, ինքը հասարակական գործիչ է և քանի որ հասարակության լայն շերտերի հետ առընչություն ունի»:  

Նշենք, որ մամուլում հրապարակված հոդվածներից մեկի համաձայն Կարապետյանը չի ցանկանում աշխատել Մինասյանի հետ, քանի որ նրա ասված խոսքերը վատ հիշողություն են թողել վարչապետի մոտ: