Դավիթ Լոքյանն ընդունել է ECORYS տեխնիկական օժանդակության ծրագրերի ղեկավարին

ՀՀ  տարածքային կառավարման և զարգացման նախարարի պաշտոնակատար Դավիթ Լոքյանն այսօր ընդունել է ECORYS տեխնիկական օժանդակության ծրագրերի ղեկավար Ռոբերտ Կիրիենկոյին և  ՀՀ- ում ԵՄ պատվիրակության ծրագրերի ղեկավար Մոնիկա Պապյանին:

Ինչպես հայտնում են նախարարության տեղեկատվության և հասարակայնության հետ կապերի վարչությունցի, Եվրամիությունն՝ ի դեմս ECORYS կազմակերպության տեխնիկական աջակցության թիմի, ՀՀ տարածքային կառավարման նախարարության հետ համատեղ իրականացրել և շարունակում է իրականացնել տարածքային զարգացման հետ կապված մի շարք ծրագրեր:

«Շատ լավ ժամանակ ենք հանդիպել, շատ ուրախ եմ, որ ռազմավարությունը ընդունվեց և հիմա ռազմավարությունից բխող բոլոր բարեփոխումների գործընթացը սկսելու ճիշտ ժամանակն է»,- նշել է Ռոբերտ Կիրիենկոն: 

Դավիթ Լոքյանն իր հերթին նշել է, որ առաջիկայում մեծածավալ աշխատանքներ են սպասվում և պետք է հասցնել կարճ ժամանակահատվածում իրականացնել դրանք:

«Մենք ծրագրավորել ենք նախարարության գործունեությունը: Այն խնդիրները, որ ուղղակիորեն կախված են մեր գործունեությունից, ներառվելու են 2017 թվականի կառավարության գերակա ուղղությունների մեջ»,-  ասել է նախարարը: Խոսելով ընթացիկ ծրագրերից` նա նշել է, որ ՏԿԶ նախարարությունը պատրաստվում է  հոկտեմբեր-նոյեմբեր ամիսներին մտնել մի գործընթացի մեջ, որով մասնակից կդառնա  Հայաստանի բոլոր համայնքների հնգամյա ռազմավարության կազմմանը: Հատուկ մեթոդական ուղեցույցներով այնպիսի ուղղություններ կտրվեն այդ աշխատանքին, որ ապագայում այն դառնա ռազմավարության ստրուկտուրալ մաս:

Հանդիպմանը կողմերը քննարկել են նաև տարածքային զարգացման բարեփոխումների գործողությունների ծրագրին վերաբերող մի շարք հիմնախնդիրներ՝ յուրաքանչյուր մարզի համար տարածքային զարգացման ռազմավարության մշակումը, խորհրդակցությունների անցկացումը, ռազմավարության ընդունումը: Կողմերն ընդգծել են նաև աշխատանքների մեթոդաբանության վերանայման անհրաժեշտությունը: Քննարկման ժամանակ անդրադարձ է եղել տարածքային զարգացման ֆինանսավորման մեխանիզմում նոր միջազգային դրամաշնորհներ ներգրավելու և տարածքային զարգացմանն ուղղված ֆինանսավորման հիմնահարցերին: Կարևորվել է  կենտրոնական տարածքային և տեղական մակարդակով տարածքային զարգացման ցուցանիշների համակարգային փոխկապակցումը: