Համեղ ու օգտակար սառը դեսերտ

Սովորաբար դեսերտների մասին վատ կարծիքի են` դրանք օգտակար չեն, շատ քաղցր են (բոլորի համար չեն)  ու առհասարակ կարելի է դրանց մասին հիշել մեկ-մեկ` ծնունդներին ու տարբեր առիթներով:

Այս մեկը դրանցից չէ` նախ այն շատ հեշտ է պատրաստվում ու առանց որևէ գազօջախի միջամտության և ամենակարևորը, այն օգտակար է ու կարող է դառնալ նաև շատ լավ նախաճաշ:

Մեզ պետք է ընդամենը`

Յուղազրկված կաթնաշոռ (կարող եք վերցնել նաև սովորական)

1 շիշ ձեր նախընտրած մրգի համով ըմպելի յոգուրտ

* օգտագործեք տեղականը` դրանք ավելի բնական են, քան արտասահմանից բերված սինթետիկ համերով յոգուրտները:

1 բաժակ վարսակ

100 գր գետնանուշ

10-15 գր դառը շոկոլադ 80%

3 ճգ մուգ կակաոյի փոշի

* Կակաոն գնեք կիլոյով` կողմնորոշվեք դրա մուգ գույնով ու գնելիս անպայման փորձեք:

1 բաժակ ձեր նախընտրած հատապտուղից (ես փորձել եմ մոշ և մորի)

Պատրաստման եղանակը բարդ չէ`

Վերցրեք այն ամանը, որի մեջ տորթ եք պատրաստում, ավելի լավ, եթե այն ռետինից է: Վարսակը խառնեք գետնանուշի հետ, դրեք տոպրակի մեջ ու գրդնակով մի փոքր անցեք վրակով: Պետք չի դրանք շատ փշրել, ուղղակի մի փոքր մանրացրեք: Հիմա այն տեղափոխեք ամանի մեջ ու հավասար բաշխեք բոլոր անկյուններով:

Խառնեք յոգուրտն ու կաթնաշորը` միքսերով կամ ձեռքով (նայեք ձեր հարմարությանը): Լցրեք լուծույթի մի մասը վարսակի շերտի վրա: Հիմա ավելացրեք հատապտուղի շերտը:

* Եթե շատ քաղցրակեր եք ու չեք դիմանում` ուզում եք շաքարավազ ավելացնել, ապա փորձեք այն փոխարինել մեղրով…թե չե իմ առողջ ռեցեպտը կփչացնեք :)

Հատապտուղի շերտից հետո ավելացրեք մնացած յոգուրտային լուծույթն ու ծածկեք այն վարսակի շերտով: Վրան ավելացրեք կակաոյի փոշի ու մանրեցված շոկոլադ, դրեք սառնարանի ամենացուրտ հատվածը:

5-6 Ժամից կամ հաջորդ առավոտ ձեր տորթը կպնդանա` կարող եք այն ամանից հանել:  Շուռ տալուց հետո կրկին ցանեք կակաոյի փոշի:

Մատուցելիս տորտի վրա ավելացրեք թարմ հատապտուղ:

Անպայման փորձեք այս ռեցեպտն ու կիսվեք տպավորություններով :)

P.S.

Ռեցեպտում գործածվող բոլոր բաղադրիչները լավ են սրտի, մաշկի, արյան շրջանառության ու իմմունիտետի կարգավորման համար:

Հատապտուղները հարուստ են C վիտամիններով ու անտիօքսիդանտներով (սրանք վերացնում են ծխախոտի կամ վնասակար սննդի միջոցով մեր օրգանիզմ թափանցող ազատ ռադիկալները):

Սիրով`

Նյամիկ Էլլա Կանեգարիան