Բազմաթիվ ահազանգեր ունենք փող բաժանելու մասին. Էդմոն Մարուքյան
Վանաձորի թիվ 30/37 ընտրատեղամասում կեսօրին իր ընտրական պարտքը կատարեց Վանաձորից ընտրված ԱԺ պատգամավոր Էդմոն Մարուքյանը:
Քվեարկությունից հետո պատգամավորը պատասխանեց լրագրողների հարցերին: Վերջինս նշեց, որ վաղ առավոտից կուսակցության շտաբներում խախտումների հետ կապված բազմաթիվ ահազանգեր են ստացվել: «Ահազանգեր կան նախ կուտակումների հետ կապված, տեղամասեր կան, որոնց դիմաց հենց ավագանու թեկնածուներն են կանգնած: Դա բնականաբար քարոզչություն է եւ բնականաբար ուղղորդում են մարդկանց: Բազմաթիվ ահազանգեր ունենք փող բաժանելու մասին: Նաեւ կարուսելի դեպքեր կան: Նաեւ հեռախոսով նկարելու բազմաթիվ ահազանգեր են արձանագրված»,- նշեց պատգամավորը:
Է. Մարուքյանը նշեց, որ ընտրությունների ավարտից հետո մի շարք տեղամասերի մասով վերահաշվարկի դիմումներ են ներկայացնելու: Ընտրվելու են հատկապես այն տեղամասերը, որոնց հետ կապված ահազանգերը մեծ թիվ են կազմում: Նրա խոսքով նման խախտումների գրանցումն սպասելի էր: Դրանք գրանցվել են նաեւ նախորդ ընտրությունների ժամանակ:
Չնայած դրան, պատգամավորն արդյունքների մասով հանգիստ է: Ասում է. «Ես շատ հանգիստ եմ եւ շատ վստահ եմ, որ երբ քաղաքացիները գնում ու քվեարկում են, այդ անձն ընտրվում է: Ամեն ինչ էլ լինում է, բայց սա մարդկանց չպետք է հուսալքի»: Ինքը՝ Է. Մարուքյանը քվեարկել է հանուն երբեմնի կանաչ Վանաձոր անվան վերադարձի:
1
2
3
4
5
3
4
5
2
3
4
5
