Հարկային օրենսգիրքն ընդունվեց. Բագրատյանը փորձեց «պատը ծակել», բայց չստացվեց

Հայաստանի Ազգային ժողովում այսօր՝ հոկտեմբերի 4-ին, երրորդ ընթերցմամբ եւ ամբողջութամբ ընդունվեց Հարկային նոր օրենսգիրքը:

NEWS.am-ի թղթակիցը հայտնում է, որ օրինագծին կողմ է քվեարկել 78, դեմ 19 պատգամավոր, ձեռնպահ չի եղել:

Նախքան քվեարկությունը ՀԱԿ խմբակցության պատգամավոր Հրանտ Բագրատյանը նշեց. «Մենք փորձեցինք այդ պատը ծակել, օրենսգիրքը չի համապատասխանում ՀՀ զարգացման պահանջներին: Ոչ մի բան չի ստացվում փոխել: Ուզում եմ հիմա զգուշացնել, որ Հարկային օրենսգիրքը երկու հակասահմանադրական դրույթ է պարունակում. նախ կանխավճար է պահանջում մարդուց, երբ նա գումար չի աշխատել: Երկրորդ, Սահմանադրության 17-րդ հոդվածն ասում է, որ պետությունն ապահովում է կրոնական կազմակերպությունների ազատություն: Մենք ունենք կաթոլիկ հայեր 25 տոկոս, բողոքական եկեղեցի, ռուս ուղղափառներ: Ստացվում է, որ կաթոլիկ եկեղեցին հարկվում, իսկ Հայ առաքելական եկեղեցին չի հարկվում: Դա սահմանադրության կոպիտ խախտում է»:

Իր հերթին անկախ պատգամավոր Էդմոն Մարուքյանը նշեց, որ ինքը 10 էջանոց առաջարկներ է ներկայացրել, որոնց 90 տոկոսը չի ընդունվել, հետեւաբար դեմ է քվեարկելու օրենսգրքին. «Ես կարծում եմ, որ դա ՀՀ տնտեսության համար լուրջ վտանգ է այն, որ Հայաստանն իր վարկային պարտավորությունները չի կարողանալու կատարել 1,5 տարի հետո, այս օրենսգիրքը այդ հարցն էլ չի լուծելու»:

ԲՀԿ խմբակցության պատգամավոր Միքայել Մելքումյանն էլ հայտարարեց, որ Հարկային օրենսգիրքը հստակ նահանջ է փոքր ու միջին բիզնեսի համար: «Այսինքն շեմը իջեցնել, գալ երեք տարվա վաղեմության շեմին, ինչ է թե պետությունը չի կարողանում շրջանառություն ֆիքսել, անընդունելի է: Ընդամենը 2 տարի անց միջին եկամուտներ ունեցողների հարկային բեռն ավելացնում ենք: ԲՀԿ-ի կուսակցականները չեն մասնակցի քվեարկությանը»:

ՀԱԿ խմբակցության ղեկավար լեւոն Զուրաբյանը եւս նշեց, որ իրենք դեմ են քվեարկելու, քանի որ հարկային օրենսգրքի քննարկումը չի համապատասխանել ժողովրդավարական քննարկման նորմերին: «Իրականում թեեւ պայմանավովածություն էր ձեռք բերվել, որ մեր փորձագետները կմասնակցեն քննարկումներին, բայց նրանց ոչ մի անգամ չեն հրավիրվել»