«Հակամարտությունը Սիրիայում կրկին թևակոխել է ակտիվ ռազմական գործողությունների հերթական շրջափուլ»

«ՀՀ կողմից  Հալեպ մարդասիրական օգնություն ուղարկելու իրողությունը ողջունելի է, և հուսանք՝ պարբերական բնույթ կկրի»,- Shabat.am-ի հետ զրույցում նման կարծիք է հայտնում արաբագետ Արմեն Պետրոսյանը:

Արաբագետը նշում է. «Մասնավոր, տարաբնույթ հասարակական, հոգևոր, բարեսիրական կազմակերպությունների կողմից աջակցության դեպքեր Հայաստանից նախկինում ևս եղել են, սակայն պետական մակարդակով  և նման եղանակով սա առաջին փորձն էր: Ներկայումս հակամարտությունը Սիրիայում կրկին թևակոխել է ակտիվ ռազմական գործողությունների հերթական շրջափուլ, որը առկա ակտիվությամբ, կամ գուցե նվազ թեժությամբ կարող է շարունակվել ևս մի քանի ամիս, ինչը դարձյալ լրջորեն կսրի անվտանգային, կենցաղային, մարդասիրական իրավիճակը Սիրիայի  տարածքում: Այս համատեքստում, շատ կարևոր է, որ  Հայաստանի կողմից ցուցաբերվող մարդասիրական աջակցությունը Սիրիայում ապրող մեր հայրենակիցներին  կրի պարբերական բնույթ: Ընդ որում, այդ աջակցությունը պետք է ոչ միայն հալեպահայերին ուղղված լինի, այլև ռազմական հակամարտության ճիրաններում գտնվող այլ բնակավայրերում ապրող ինչպես մեր հայրենակիցներին, այնպես էլ՝ նման օժանդակության կարիք ունեցող Սիրիայի այլ քաղաքացիներին»:

Անդրադառնալով այն կարծիքներին, թե հնարավոր չէ՞ արդյոք, որ մեր հայրենակիցները տեղափոխվեն Հայաստան, Պետրոսյանը նշում է. «Հայաստան կարող են տեղափոխվել, եթե իրենք ցանկանան, նախաձեռնություն ցուցաբերեն՝ դուրս գալու երկրից, լքելու սեփական բնակավայրերը: Հալեպում առկա տրամադրություններից, հնչող կարծիքներից կարելի է եզրակացնել, որ քաղաքը զանգվածաբար լքելու մտադրություն կամ գուցե նաև հնարավորություն Հալեպում մնացած հայերի զգալի մասը չունի: Սիրիայի մեր  հայրենակիցները համարվում են Սիրիայի Արաբական Հանրապետության քաղաքացիներ և ՀՀ կողմից, ինքնուրույն, առանց Դամասկոսի, կամ միջազգային կառույցների հետ համաձայնեցման,  ուղղակի տարհաման գործողություններ չեն կարող իրականացվել, քանի որ դա միջազգային իրավունքի սկզբունքների խախտում է՝ միջամտություն այլ երկրի ներքին գործերին»: