Հայ-գերմանական համագործակցությունը Հայաստանի համար կարեւոր է. Սերժ Սարգսյան (ֆոտո)

Նախագահ Սերժ Սարգսյանն այսօր ընդունել է Գերմանիայի Դաշնային Հանրապետության Բունդեսթագի փոխնախագահ Յոհաննես Զինգհամմերի գլխավորած պատվիրակությանը, որի կազմում են նաեւ «Կարդինալ Հյոֆների միության» ներկայացուցիչները:

ՀՀ Նախագահը հանդիպման սկզբում նախ շնորհավորել է հյուրերին Գերմանիայի ազգային տոնի՝ Միասնության օրվա առթիվ՝ մաղթելով բարեկամ Գերմանիային խաղաղություն եւ հետագա բարգավաճում:

Հայ-գերմանական երկկողմ հարաբերությունների ամրապնդման տեսանկյունից Նախագահ Սերժ Սարգսյանը կարեւորել է բարձրաստիճան փոխայցելությունները: Նախագահը հաճույքով է հիշել նաեւ ս.թ. ապրիլին Գերմանիա կատարած իր այցը եւ փոխըմբռնման ու անմիջական մթնոլորտում կայացած հանդիպումները երկրի բարձրաստիճան ղեկավարության հետ: Սերժ Սարգսյանը հույս է հայտնել, որ պարոն Զինգհամմերի գլխավորած ներկայացուցչական պատվիրակության այցը առաջին քրիստոնյա երկիր կլինի արդյունավետ եւ լի անմոռանալի տպավորություններով, ինչը երկկողմ հարաբերությունների սերտացման ուղղությամբ ջանքերին ավելի մեծ հաստատակամություն կհաղորդի:

Համակարծիք լինելով, որ Հայաստանի եւ Գերմանիայի միջեւ հարաբերությունները հիմնված են փոխադարձ հարգանքի եւ վստահության վրա՝ զրուցակիցներն այդ հարաբերությունների ամրապնդման ու խորացման գործում զգալիորեն կարեւորել են միջխորհրդարանական համագործակցության զարգացումը: ՀՀ Նախագահը գոհունակությամբ է փաստել, որ վերջին ժամանակաշրջանում Բունդեսթագի խորհրդարանականները Հայաստանից բացի, այցելում են նաեւ Լեռնային Ղարաբաղ՝ տեղում անմիջականորեն ծանոթանալու ԼՂ հիմնախնդրին:

Սերժ Սարգսյանը բարձր է գնահատել Գերմանիայի դիրքորոշումը Հայոց ցեղասպանության դատապարտման հարցում, որն արտահայտվեց երկրի բարձրագույն օրենսդիր մարմնի կողմից Ցեղասպանության ճանաչման ու դատապարտման բանաձեւով:

Անդրադարձ է եղել ՀՀ-ԵՄ համագործակցությանը: Հանրապետության Նախագահն ընդգծել է, որ հայ-գերմանական համագործակցությունը Հայաստանի համար կարեւորվում է նաեւ Եվրամիության հետ հարաբերությունների համատեքստում՝ հաշվի առնելով Գերմանիայի ծանրակշիռ դերը ԵՄ կառույցներում եւ շնորհակալություն է հայտնել Արեւելյան գործընկերության շրջանակներում մեր երկրին Գերմանիայի օժանդակության համար:

Զրուցակիցները երկուստեք կարեւորել են միջպետական հարաբերություններում հատուկ տեղ զբաղեցնող գիտակրթական եւ մշակութային փոխգործակցությունը:

Նախագահը բարձր է գնահատել Հայաստանի սոցիալ-տնտեսական զարգացման նպատակով Գերմանիայի կառավարության կողմից տարիներ շարունակ Հայաստանին տրամադրվող ֆինանսական եւ տեխնիկական աջակցությունը:

Գերմանիայի Բունդեսթագի փոխնախագահ Յոհաննես Զինգհամմերը պատվիրակության անունից շնորհակալություն է հայտնել ՀՀ Նախագահին ընդունելության համար եւ ընդգծել, որ չնայած Գերմանիան ու Հայաստանը չունեն ընդհանուր սահման, բայց կիսում են նույն արժեքները: Նրա խոսքով, գերմանացիներն աշխարհի առաջին քրիստոնեական պետության հետ հատուկ զգացումով են կապված, եւ պատմական ճշմարտությունը փաստող Հայոց ցեղասպանության բանաձեւն էլ միտված է խաղաղությանը, քանի որ նրա համոզմամբ, ճշմարտությունը խաղաղության հասնելու համար կարեւոր նախապայման է:

Զրուցակիցները հանդիպմանն անդրադարձել են նաեւ միջազգային արդի խնդիրներին եւ խաղաղությանն սպառնացող մարտահրավերներին:

Բունդեսթագի պատգամավոր Քրիստիան Հազեն ՀՀ Նախագահին է հանձնել ՄԱԿ-ի Մարդու իրավունքների դրույթների համաձայն 2008թ. ձուլված 29 բրոնզե աղավնիներից մեկը: Աղավնին տրվում է այն քաղաքական, պետական գործիչներին, ովքեր պայքարում են խաղաղության եւ հատկապես կրոնական ազատությունների համար: