ՀՀ-ն իրավական համակարգում գենդերային հավասարության համար հատուկ միջոցներ ձեռնարկած քիչ երկրներից. ԵԽ

Եվրոպայի խորհուրդը հրապարակել է կազմակերպության անդամ երկրների իրավական համակարգերի գնահատման վերաբերյալ զեկույց: Ինչպես տեղեկացրին ԵԽ մամուլի ծառայությունից, զեկույցում ներկայացվում է 45 երկրների իրավական համակարգերը, նշվում դրանց տրվող ֆինանսական միջոցները և գնահատվում դրանց ծախսման արդյունավետությունը:

«Հայաստանն այն քիչ երկրներից է, որն իրականացրել է հատուկ միջոցառումներ իրավական համակարգում գենդերային հավասարության առաջ մղման համար»,- նշված է զեկույցում: Շեշտվում է, որ դատավորների 77 տոկոսը տղամարդիկ են, 23 տոկոսը կանայք, սակայն ստեղծված ներգրավման համակարգը խրախուսում է կանանց մասնակցությունը, մասնավորապես, ըստ սահմանված կարգի, դատավորների թեկնածուների ցուցակները պետք է առվազն պարունակեն 25 տոկոս միևնույն սեռի ներկայացուցիչներ: Զեկույցում միաժամանակ ընդգծվում է, որ Հայաստանում որևէ դատարանի կին նախագահ չկա:

«Ընդհանուր առմամբ Հայաստանում կան 226 դատավորներ, այսինքն` յուրաքանչյուր 100 հազար բնակչին 8 դատավոր: Այս թիվը 2010թ-ի համեմատ աճել է 11 տոկոսով: Դատախազների թիվը յուրաքանչյուր 100 հազար բնակչին 10.1 է, որը գրեթե անփոփոխ է 2010թ-ից ի վեր»,- ասվում է զեկույցում:

«10 երկրներում` Հայաստանում, Ադրբեջանում, Բուլղարիայում, Ֆինլանդիայում, Վրաստանում, Իտալիայում, Լատվիայիում, Մոնտենեգրոյում և Նիդերլանդներում նկատվում է նշված ժամանակահատվածի դանդաղ, սակայն շարունակական աճ: Այս միտումը պետք է արձանագրել, սակայն այն դեռևս չի կարելի համարել մտահոգիչ»,- ասված է զեկույցում: