ԱՄՆ Դենվեր քաղաքը ճանաչել է Արցախի անկախությունը

Դենվերի քաղաքապետ Մայքլ Բ․ Հանքոքը 2016-ի սեպտեմբերի 21-ը պաշտոնապես հռչակել է Հայաստանի անկախության օր «Հայկական երկու պետությունների՝ Հայաստանի ու Արցախի համար», հայտնում է Հայ Դատի Ամերիկայի հանձնախումբը։

«Քաղաքապետ Հանքոքի կողմից Հայաստանի անկախության տոնի հռչակումը ու ագրեսիայի դեմ Արցախի շարունակվող պայքարի ճանաչումը վկայում է այն մասին, որ Կոլորադոյի նահանգում հայկական համայնքը հետամուտ է մարդու իրավունքների վերաբերյալ իրազեկումը բարձրացնելուն՝ այդ թվում բարձրաձայնելով 2016 թ․ ապրիլին հայերի դեմ Ադրբեջանի գործած ռազմական հանցագործությունների մասին»,- նշել է Հայ դատի Ամերիկայի հանձնախբի գործադիր տնօրեն Էլեն Ասատրյանը։ «Մենք շնորհակալ ենք Հանկոկի աշխատակազմին մարդու իրավունքներին նրանց աջակցության համար, նաեւ որ ճանաչում են Արցախի անկախությունը ու նրա պայքարը հանուն Արցախի քրիստոնեական ժառանգության պահպանման ու նրա ազատատենչ հայ բնակչությանը պաշտպանության այն բանակից, որը ավերում է հուշարձանները ու կտտանքների ենթարկում թե՛ խաղաղ քաղաքացիներին, թե՛ զինվորներին»,- շարունակել է Ասատրյանը։

Հռչակագրում նշված է, որ Դենվերը «հազարավոր հայրենասեր ու աշխատասեր ամերիկահայերի հայրենիքն է , որոնք տասնյամյակներ շարունակ հարստացրել են մեր քաղաքը» ու որ Արցախը շարունակում է իր պայքարը՝ «պահպանելու համար իր հայկական ինքնությունը, քրիստոնեական հուշարձանները ու սահմանների անվտանգությունը» Քաղաքապետ Հանքոքի հռչակագիրը նաեւ կարեւորում է Հայ Դատի ամերիկյան հանձնախմբի մեծ ավանդը հայկական համայնքի խնդիրները բարձրաձայնելու գործում ու շնորհավորում հայկական համայնքին՝ «թե իրենց ազգային ժառանգությանը, թե իրենց նոր հայրենիքի բարգավաճմանը նվիրված լինելու ու բոլոր մարտահրավերներին դիմակայելու նրանց կարողության համար»։