Հոսանքի թանկացման երեք օբյեկտիվ պատճառներից՝ վարչապետի մեջբերած, երկուսը սուբյեկտիվ են

Վախթանգ Սիրադեղյանը ֆեյսբուքյան իր էջում գրում է. 

Հոսանքի թանկացման երեք օբյեկտիվ պատճառներից՝ վարչապետի մեջբերած, երկուսը սուբյեկտիվ են, իսկ մեկը ժամանակավոր է: Սկսենք վերջից՝ ժամանակավորից՝ ատոմակայանը 2013-ին չի գործել 88 օր, ինչի առաջացրած լրացուցիչ ծախսերը եթե բաժանվեին 3-4 տարվա վրա, ապա դրանց չեզոքացումը ավելի տանել կլիներ սակագնային առումով:

Սակավաջրության և Հրազդան 5-ի կողմից թանկ հոսանք արտադրելը. դրան կարելի է հակադրել իրանական ավելի էժան գազի, որ գալիս է Հայաստան, վերամշակվում և վերադառնում հոսանքի տեսքով, ծավալների աճը:

Վերջին 3 տարում դոլար-դրամ փոխարժեքի 20 տոկոս աճը. նորմալ ընկերության նորմալ մենեջերը կփնտրեր այլընտրանք դոլարային վարկին, հատկապես, որ ՀԷՑ-ը ռուսական ընկերություն է:

Այնպես, որ ցանկության դեպքում, եթե դրան գումարվեր սրտացավությունը, ինչը բնականաբար բացակայում է ռուս (տվյալ դեպքում) մենեջերի մոտ, թվարկված երեք գործոնների ազդեցությունը կնվազեցվեր համարյա թե զրոյական աստիճանի: Էլ չեմ խոսում մնացած սուբյեկտիվ պաճառների մասին:

Բայց դրա համար երկրին անհրաժեշտ է ինքնիշխանություն, ինչն այսօր դժբախտաբար բացակայում է...