Կստացվի, վստահ եմ. Աշոտյանը՝ Վանաձորի քաղաքապետի ընտրության մասին

Վանաձորի քաղաքապետի ընտրություններում ՀՀ ԱԺ պատգամավորների շահագրգիռ եւ ակտիվ մասնակցությունը ուղղակի միջամտության եւ պրոտեկցիայի տարրեր է պարունակում: Այս մասին Facebook-ի իր էջում գրել է ՀՀԿ փոխնախագահ Արմեն Աշոտյանը:

«Անկախ Վանաձորի քաղաքապետի ընտրությունների արդյունքից ակնհայտ է, որ

1. ՀՀ ԱԺ պատգամավորների նման շահագրգիռ եւ ակտիվ մասնակցությունը ուղղակի միջամտության եւ պրոտեկցիայի տարրեր է պարունակում:

2. ՀՀ օրենքները պետք է հարգվեն բոլորի կողմից, վեր լինեն ընթացիկ քաղաքական շահից:

3. Կրքերը պետք է հանդարտվեն եւ գործընթացը վերադառնա օրենքի հուն: Ժողովրդավարությունը բարդ մշակույթ է, բայց կամաց-կամաց կստացվի, վստահ եմ»,-գրել է նա:

Ավելի վաղ NEWS.am-ը հայտնել էր, որ այսօր՝ հոկտեմբերի 10-ին,  Վանաձորի քաղաքապետի ընտրությունները անցնում են թեժ մթնոլորտում: Վանաձորի ավագանու նիստին մասնակցում են ԱԺ պատգամավորներ Էդմոն Մարուքյանն ու ՕԵԿ խմբակցության ղեկավար Հեղինե Բիշարյանը: Այն բանից հետո, երբ Վանաձորի ավագանու «Լուսավոր Հայաստանի» ներկայացուցիչը քվեախցից դուրս է եկել քվեաթերթիկն առանց ծալելու: Դա առաջ է բերել ներկաների դժգոհությունը: քաղաքապետի ՀՀԿ-ի թեկնածու Մամիկոն Ասլանյանը հայտարարել է, որ դա օրենքի խախտում է, քվեարկությունը պիտի լինի գաղտնի: Նրա եւ Էդմոն Մարուքյանի միջեւ թեժ բանավեճ է գրանցվել:

Հիշեցնենք, որ Վանաձորի ավագանու ընտրություններում Հայաստանի Հանրապետական կուսակցությունը ստացել էր 13, «Լուսավոր Հայաստանը»՝10, «Հայկական Վերածնունդը»՝ 5, «Բարգավաճ Հայաստանը»՝ 3, ՀՅԴ-ն՝ 2 մանդատ:

«Լուսավոր Հայաստան», ԲՀԿ եւ «Հայկական վերածնունդ» կուսակցությունները հուշագիր են ստորագրել եւ պաշտպանելու են «Լուսավոր Հայաստանի» ցուցակը գլխավորող Քրիստ Մարուքյանին: Փաստացի ՀՀԿ-ն ու ՀՅԴ-ն միասին ունեն 15 մանդատ, իսկ «Լուսավոր Հայաստանը», «Հայկական վերածնունդն» ու ԲՀԿ-ն միասին՝ 18 մանդատ:

ՀՀԿ թեկնածուն Մամիկոն Ասլանյանն է: