Ստամբուլում լույս է տեսել ցեղասպանությունից հետո նոր գաղթավայրերում հայերի ապրած կյանքի մասին թուրքերեն գիրք

Ստամբուլում գործող «Արաս» հայկական հրատարակչությունը թուրքերեն նոր գիրք է հրապարակել, որը պատմում է Հայոց ցեղասպանության տարիներին իրենց քաղաքներից և գյուղերից աքսորված հայերի՝ գաղթի ճանապարհի կանգառների և ցեղասպանությունից հետո նոր գաղթավայրերում ապրած կյանքի մասին: 

Գիրքն արդեն տեղ է գտել «Արաս»-ի պաշտոնական կայքում, որտեղից էլ գնորդները կարող են այն պատվիրել համացանցի միջոցով:

Լուսանկարիչ Էրհան Արըքը գրքում ներկայացրել է իր հատուկ ֆոտոշարքը, որն արտացոլում է գաղթելու միջոցով ցեղասպանությունից փրկված հայերի նոր կյանքի ուղիները: Լուսանկարիչը ֆոտոշարքին կից նաև ներկայացրել է ցեղասպանությունը վերապրած և գաղթի ճանապարհներով անցած հայերի ժառանգների ընտանեկան պատմությունները: 

Կայան կոչվող գրքում տեղ գտած լուսանկարներն Արըքն արել է 2014-2016թթ.-ին, ֆոտոշարքի պատրաստման համար լուսանկարիչը շրջել է տարբեր քաղաքներով և երկրներով: Էրհան Արըքը, մանավորապես, շրջել է Պարսկաստանի Սպահան, Թեհրան, Իրաքի Զահո և Դուհոք, Լիբանանի Բեյրութ և Ջուբեյլ, Հորդանանի Ամման, Իսրայելի Երուսաղեմ, Պաղեստինի Բեյթուլլահիմ, Հայաստանի Երևան և Աշտարակ, Թուրքիայի Անթակյա քաղաքներով, ինչպես նաև՝ Ստամբուլի հայկական թաղամասերում: 

«Էրհան Արըքը պատմության թողած ծանր բեռը ուսերից թոթափելու համար անցնում է սահմանն ու նայում մարդկանց աչքերի մեջ: Եկեք մենք էլ միանանք այս ճանապարհորդությանը», - գրված է գրքի նկարագրության մեջ: 

«Արաս» հրատարակչությունը հիմնադրվել է Ստամբուլում 1993թ.-ին: Հրատարակչությունը կարճ ժամանակում կարողացավ շատերի համար դառնալ «պատուհան» դեպի հայկական գրականություն, քանի որ զբաղվում է հայ դասականների, հայոց պատմության և Հայոց ցեղասպանության վերաբերյալ բազմաթիվ գրքերի թուրքերեն թարգմանությամբ՝ հասանելի դարձնելով այն թուրքական հասարակության բոլոր խավերին: 

Հրատարակչությունն ունի նաև արևմտահայերենով հրատարակված գրքեր: