ՀՀԿ-ն մարդ գնելով՝ թուլացնում է ընդդիմությունը. Ստեփան Սաֆարյան

Հայաստանի հանրապետական կուսակցությունը մարդ գնելով թուլացնում է ընդդիմությանը։ Այս մասին այսօր՝ հոկտեմբերի 11-ին,NEWS.am-ի հետ զրույցում ասաց Միջազգային եւ անվտանգության հարցերի հայկական կենտրոնի ղեկավար, քաղաքագետ Ստեփան Սաֆարյանը:

«Եթե ՀՀԿ-ն նորմալ է նայում ընտրողների պասիվությամբ տեղի ունեցած ընտրություններում իրենց հաղթանակին, ապա ՀՀԿ-ն խորագույն պրոբլեմ ունի։ Կարծես հենց ՀՀԿ-ն էր, որ հայտարարում էր, որ իրենց ձեռնտու է ուժեղ ընդդիմություն, ուզում է տեսնել կայացած կուսակցական համակարգ եւ հենց այդ փաստարկներով փոխեց սահմանադրությունը, բայց պարզվեց, որ հենց ինք է մարդ գնելով թուլացնում ընդդիմությանը»,-ասաց նա։

Քաղաքագետի խոսքով՝ Հայաստանի հանրապետական կուսակցության ցուցակը գլխավորող Մամիկոն Ասլանյանի հայտարարությունը, թե 23 ձայն է ակնկալել, նույնպես անհասկանալի է. «Մի հարցնող լինի, թե 23 մանդատ չես ստացել, 23 ձայն որտեղի՞ց ես ակնկալում։ Կամ պիտի իսկապես իրենք հայտարարեն, որ որոշ ընդդիմադիր ներկայացող խմբակցություններ իրենց գործընկերն են, կամ պետք է հայտարարեն, որ իրենց խմբակցությունը մեծացել է՝ 4 ընդդիմադիրների հաշվին, որոնք քվեարկել են իրենց թեկնածուի օգտին, կամ էլ պետք է խոստովանեն, որ իրենք մարդ են գնել»։

Քաղաքագետը նշեց, որ այժմ բոլորը հակված են նրան, որ Հայաստանի հանրապետական կուսակցության թեկանծուի օգտին քվեարկել են «Հայկական վերածնունդ» կուսակցության անդամները՝ մտածելով, որ այդպիսի գործարք կարող էր լինել՝ Վանաձորում իրենց կուսակցության ցուցակը գլխավորող Արկադի Փելեշյանի մասնակցությամբ ծեծկռտուքի գործը փակելու դիմաց. «Բացառում եմ, որ ձայները գնացել են «Լուսավոր Հայաստանից» եւ կարծում եմ՝ այդ ձայները գանցել են «Հայկական վերածնունդից կամ էլ ԲՀԿ-ից։ Այժմ ավելի շատ «Հայկական վերածնունդի» վրա են կենտրոնացել, որովհետեւ այդ օրերին նրանց թեկնածուն հայտնվեց կրիմինալ պատմության մեջ՝ ծեծելով հոգեւոր հովիվի։ Եվ ինչպես այս պահին առկա արտահոսքն է վկայում, այս գործով բողոքները հետ են վերցվում, կարծում եմ՝ ոչ պատահականորեն։ Պատահական չէր նաեւ, որ Հեղինե Բիշարյանը հայտարարում էր, որ այնտեղ ոչ թե ծեծկռտուք է եղել, այլ ընդամնեը քաշքշոց։ Այս բոլոր հայտարարությունները լսողները չեն կարող չմտածել, որ գործը փակվում է՝ ՀՀԿ-ի թեկնածուի օգտին նրանց քվեարկության դիմաց»։