Թրամփը պատրաստ է հրաժարվել կուսակցական ղեկավարների աջակցությունից

Հանրապետական կուսակցությունից ԱՄՆ-ի նախագահի թեկնածու Դոնալդ Թրամփը հայտարարել է, թե կուսակցության ղեկավարության կողմից աջակցության կարիք չունի եւ քննադատության է ենթարկել ԱՄՆ-ի Կոնգրեսի Ներկայացուցիչների պալատի խոսնակ Փոլ Ռայանին ու նրա կուսակից սենատոր Ջոն Մաքքեյնին: Ավելի վաղ հանրապետական կուսակցության ղեկավարներն ու հայտնի անդա մները վճռականորեն դատապարտել են կանանց վերաբերյալ նախագահի թեկնածուի վիրավորական արտահայտությունները:

«Հիանալի է, որ ինձանից հանեցին կապանքները, այժմ ես կարող եմ Ամերիկայի համար պայքարել այնպես, ինչպես ինքս եմ ցանկանում»,-հայտարարել է Թրամփն այն բանից հետո, երբ Ռայանն ասել է, որ այլեւս հանդես չի գալու նրա պաշտպանությամբ:

Ռայանը, Թրամփի խոսքով, «թույլ ու անարդյունավետ ղեկավար է», իսկ Մաքքեյնին անվանել է «պարզապես ահավոր դատարկախոս»:

Fox News հեռուստաալիքին տված հարցազրույցում Թրամփը, անդրադառնալով Ռայանի դիրքորոշմանը, հայտարարել է. «Ես չեմ ցանկանում, որ նա ինձ աջակցի: Նրա աջակցությունն ինձ չի հուզում»:

«Ես չԷի ցանկանա նստել այդ մարդկանց, ներառյալ Ռայանի, հատկապես Ռայանի կողքին»,-հավելել է Թրամփը:

Դիտորդները նշում են, որ ընտրությունների նախաշեմին, որոնք նշանակված են նոյեմբերի 8-ին, Հանրապետական կուսակցությունում տիրող տարաձայնությունները կարող են լուրջ բացասական ազդեցություն ունենալ Թրամփի դիրքերի վրա եւ հանգեցնել նրա պարտության: Փորձագետներից ոմանք չեն բացառում, որ այդ տարաձայնությունները կարող են հասցնել բուն կուսակցության պառակտման, հաղորդել է «Ինտերֆաքս»-ը: