Լեւոն Ալթունյանը կազատի՞ Սեյրան Օհանյանի կնոջը խորհրդականի պաշտոնից
Առողջապահության նախարար Լեւոն Ալթունյանը վստահեցնում է, որ նախկին նախարար Արմեն Մուրադյանի խորհրդականներից ազատվելու պահանջ չի դրել: Այս մասին նա նշեցNEWS.am-ի հետ զրույցում:
Լեւոն Ալթունյանի նշանակվելուց հետո լուրեր են շրջանառվում, որ նախարարությունը լքողներից մեկն էլ լինելու է պաշտպանության նախկին նախարար Սեյրան Օհանյանի կինը` Ռուզաննա Խաչատրյանը, որը թեեւ նախկին նախարար Արմեն Մուրադյանի խորհրդականն էր, սակայն հիմնականում զբաղված էր «Զինվորական բժիշկների հայկական ասոցիացիա» ՀԿ-ի աշխատանքներով, ինչի մասին հաճախ «ֆոտոէսսեներ» էր հրապարակում «Ֆեյսբուք» սոցիալական ցանցում:
Մենք տեղեկացանք, որ Խաչատրյանը ամուսնու պաշտոնանկությունից հետո արձակուրդ է մեկնել, եւ հնարավոր է` չվերադառնա նույն պաշտոնին: Լուրեր են շրջանառվում, որ նախարարն ասել է` մի դիմում էլ դու գրիր: Պաշտոնաթող նախարարի կնոջ արձակուրդ մեկնելու տեղեկությունը մեզ հետ հեռախոսազրույցում հաստատեց նաեւ նախարարը` նշելով, որ Ռուզաննա Խաչատրյանին տեսել է նշանակվելուց հետո, սակայն ազատման հարցը չի քննարկել, կվերադառնա, թե ոչ, տեղյակ չէ. «Ինչքան գիտեմ, ինքը հիմա արձակուրդում է… իր պլանների մասին դեռ տեղյակ չեմ»:
Հարցին` նրա՞ն էլ է մտադրվել ազատել զբաղեցրած պաշտոնից, Ալթունյանը կարճ պատասխանեց. «Ես պատրաստ կանդիտատուրա չունեմ էդ պաշտոնի համար»: Նա նաեւ հավելեց, որ եթե որոշի դիմում գրել ու հեռանալ, կարող է, բայց ազատվելու վերաբերյալ նրա հետ դեռ հարցը չի քննարկել: Պնդմանը, թե մինչեւ հիմա չի՞ խոսել Ռուզաննա Խաչատրյանի հետ հեռանալու մասին, պատասխանեց. «Դեռ չէ»:
Լեւոն Ալթունյանը շեշտեց նաեւ, որ իր խորհրդականները չեն կարող զբաղվել այլ գործով ու չներկայանալ աշխատանքի:
Նշենք, որ Ռուզաննա Խաչատրյանը նախկին նախարարին խորհրդատվություն էր մատուցում առողջապահական համակարգի ֆինանսավորման բարելավման, ֆինանսավորման նոր աղբյուրների ներդրման ոլորտում։
Նշենք, որ այս պահի դրությամբ նախարարն ունի չորս խորհրդական:
1
2
3
4
5
3
4
5
2
3
4
5
