Աշնանային LOOK-եր` հայ դիզայներներից . THE MUSE (լուսանկարներ)

Wnews.am-ը գրում է . 

Wnews.am-ը շարունակում է հյուրընկալվել հայ դիզայներներին ՝«Աշնանային look-եր հայ դիզայներից» խորագրի ներքո: Այս անգամ մենք The Muse-ի հյուրն էինք:  Ապրանքանիշի դիզաներ Մանե Խաչատրյանի հետ  հաճելի զրույց ենք ունեցել նորաձևության, աշնանային թրենդների, հայուհիների fashion նախասիրությունների և  The Muse-ի նորությունների մասին,  նաև ստեղծել  ենք  մի քանի  look  The Muse-ի ոճով:

-Մանե, հիշո՞ւմ ես  The Muse-ի առաջին զգեստը:

-18 տարեկանում մի զգեստի սիրահարվեցի, կտորը գնեցի և ինքս  կարեցի: Անհավանական էր, որովհետև մինչ այդ անգամ ասեղ չէի վերցրել ձեռքս: Հետո արդեն ինձ համար զգեստ  մոդելավորեցի ու մի քանի գույներով կրում էի: Բոլորը, ովքեր տեսնում էին, ուզում էին այդ զգեստից, սակայն ես չէի պատկերացնում, որ բացի ինձանից այլ մարդու համար էլ կարող եմ կարել, թերևս  հենց այդ զգեստից էլ ամեն ինչ սկսվեց: 

-Ովքե՞ր են  The Muse-ի մուսաները:

-Ոգեշնչման աղբյուր են մեր հաճախորդները.  հենց նրանք էլ մուսաներն են:  Սիրահարված եմ Balmain դիզայներ Օլիվիե Ռուստեյնի աշխատանքներին և  Valentino-ին:

-Գրեթե 2 տարի է գործում է  The Muse ապրանքանիշը, կպատմես ի՞նչ է փոխվել այս ընթացքում:

-Սկզբում  չունեի «սթաֆ» , միայն ես էի ու իմ հաշվապահը: Ամեն բան ինքս էի անում ՝ նկարել, կարել, ձեռքի աշխատանք, հիմա արդեն  The Muse-ում 17 մարդ է աշխատում:  Ինձ երջանիկ եմ համարում, որովհետև ընդամենը 2 տարի լինելով Հայաստանում՝ կարողացա գտնել ինձ և  ձեռք բերել հաճախորդների վստահությունը:

-Ինչո՞վ է պայմանավորված այդ վստահությունը:

-Մեր հաճախորդների թվում են չափազանց տարբեր մարդիկ՝ ֆինանսապես ապահովված և ոչ այնքան, հայտնի կանայք կամ ուղղակի  ուսանողներ: Բայց մենք յուրաքանչյուրի համար ունենք համապատասխան առաջարկ, այնպես, որ բոլորն էլ մեզ մոտ կգնեն այն, ինչ ուզում են: Սրահում միշտ պատրաստի հագուստներ կան և մեր այցելուները կարող են նույն պահին փորձել, պատկերացում կազմել: Հագուստները կարվում են 3-ից ոչ ավել օրինակով, որպեսզի չկրկնվեն: Պետք է հաշվի առնել, որ  մենք փոքր քաղաքում ենք ապրում:  Կտորները բերվում են Եվրոպայից, բրենդային կտորներ են:  Թերևս այս ամենը միասին ստեղծում են այդ վստահությունը:

-Ի՞նչ է  The Muse-ն առաջարկում նոր սեզոնի համար:

-Այս տարի ես սիրահարվեցի թավիշին, դա համընկավ միջազգային թրենդների հետ:  Արդեն մի քանի տարի է թավշյա էլեմենետներ եմ օգտագործում, բայց այս տարի դա հատուկ շեշտադրված  է:   The Muse-ն առաջարկելու է բնական կտորներ, խորը գույներ, կիսաերանգներ, չեմ սիրում մակերեսային գույներ: Սիրում եմ ասիմետրիա, որի շնորհիվ կարելի է ստանալ իդեալական կառուցվածք: Ակտուալ կլինեն այն գույները, որոնք  կապված են թանկարժեք քարերի հետ՝ խորը կանաչը, կապույտը:

-Ի՞նչ են սովորաբար ուզում հայուհիները  դիզայներից:

-Հայուհիները շատ նորաձև են, սիրում են հագնվել, շատ են հետևում նորաձևության  թրենդներին: Այն, ինչ նորաձև է, դա էլ ուզում են ունենալ: Մենք փորձում ենք թրենդը դարձնել յուրահատուկ,  The Muse-ի ոճին համապատասխան:

-Ինչու՞ որոշեցիր միանալ Armenian Brends նախագծին:

-Ինքս շատ եմ սիրում made in Armenia յուրաքանչյուր բան և աշխատում եմ հնարավորինս շատ օգտվել հայկական արտադրանքից, եթե կարող եմ ինչ որ բան փոխարինել հայկական արտադրանքով, անպայման անում եմ դա: Օրինակ՝ Տաշիր առևտրի կենտրոնում գտնվող  Armenian Brends -ի մեր սրահի կողքին տեղակայված է Հայաստանում արտադրված  սպորտային հագուստի սրահը,  հիմա իմ սպորտային հագուստը հենց նրանցից է:

Զրույցի վերջում Մանե Խաչատրյանին առաջարկեցինք ստեղծել  աշնանային կերպարներ՝ The Muse-ի ոճով:

Ահա, թե ինչ ստացվեց: