Ռուսաստանը, կարծես, աչք է փակում, թե իբր չի հասկացել Ալիևի ակնարկը

Ռուսաստանի արտգործնախարարության պաշտոնական ներկայացուցիչ Մարիա Զախարովան մեկնաբանել է Ադրբեջանի նախագահ Իլհամ Ալիևի հայտարարությունն այն, որ հնարավոր է համարում Լեռնային Ղարաբաղին ինքնավար հանրապետության կարգավիճակի տրամադրումը:

«Այդ արտահայտության մեջ առանցքային է «եթե կողմերը համաձայնության գան»: Կողմերը պետք է համաձայնության գան»,- ասել է Զախարովան` հավելելով, որ ոչ մի ուժային գործողություն չի կարող ազդել խաղաղ կարգավորման վրա: «Դա վերաբերում է և Լեռնային Ղարաբաղի իրավիճակին, դա վերաբերում է, ընդհանուր առմամբ, միջազգային հարաբերությունների և քաղաքա-դիվանագիտական կարգավորման տեսությանը և փորձին»,- ասել է Զախարովան:

Հիշեցենք, որ վերջերս Ադրբեջանի նախագահ Իլհամ Ալիևը ռուսաստանյան «Նովոստի» լրատվական գործակալությանը տված ծավալուն հարցազրույցում հայտարարել էր, որ ինքնավար հանրապետության կարգավիճակն է այն առավելագույն փոխզիջումը Ղարաբաղի հարցում, որին պատրաստ է այսօր գնալ Ադրբեջանը:

Դրանից հետո, ԵԱՀԿ Մինսկի խմբի համանախագահները եկան տարածաշրջան և հերթական տարածաշրջանայի այցի ընթացքում, Երևանում, Մինսկի խմբի համանախագահ Ջեյմս Ուորլիքն անդրադառնալով Ալիևի հայտարարությանը` նա ողջունեց այն առումով, որ այն հիմք է դնում Ղարաբաղի կարգավիճակի վերաբերյալ քննարկման ծավալմանը. «Նախագահ Ալիևը բացել է քննարկում Ղարաբաղի կարգավիճակի վերաբերյալ, բոլորս սա պետք է ողջունենք: Մենք պետք է ունենանք անկեղծ քննարկում Ղարաբաղի կարգավիճակի վերաբերյալ․ կողմերի դիրքորոշումները կարող են չհամընկնել, բայց կարևոր է, որ այս հարցերը դրվեն հանրային քննարկման Հայաստանի, Ադրբեջանի, և Լեռնային Ղարաբաղի բնակչության կողմից: Այսպիսով, ես ասել եմ Բաքվում և կրկնում եմ այստեղ, որ մենք ողջունում ենք նախագահ Ալիևի հայտարարությունը ոչ թե որովհետև դա վերջին խոսքն է, այլ որովհետև նա այս հարցը դնում է քննարկման: Եվ բոլոր հարցերը, որ մասն են կազմում կարգավորման պետք է դրվեն քննարկման ոչ միայն մասնավոր կերպով, այլ լայն հանրության համար»:

Ալիևի աղմուկ հանած հայտարարության առիթով, փաստորեն, եթե Վաշինգթոնը` ի դեմս, դեսպան Ուորլիքի, այն ընդունել է որպես լավ մեկնարկ` Ղարաբաղի կարգավիճակի վերաբերյալ քննարկման համար, ապա Մոսկվան, ի դեմս Ռուսաստանի արտգործնախարարության պաշտոնական ներկայացուցչի` ավելի գործնական հուն է տեղափոխում Ալիևի հայտարարությունը, ասելով, թե` «կողմերը պետք է համաձայնության գան»:

Սա, իհարկե, նորություն է, որ Մոսկվան` լինելով ԵԱՀԿ Մինսկի խմբում որպես միջնորդ երկիր, քաջ տեղյակ լինելով` կարգավորման սկզբունքների բովանդակությանը, «ձայնակցում» է Ալիևի մի հայտարարությանը, որը իրականում մերժում է փաստացի կարգավորման սկզբունքները` այն է ժողովուրդների ինքնորոշման իրավունքը, Լեռնային Ղարաբաղի կարգավիճակի հարցը:

Այսինքն, ստացվում է, որ Ռուսաստանը, կարծես, աչք է փակում, թե իբր չի հասկացել Ալիևի ակնարկը, կամ ավելի ճիշտ հասկացել է, բայց համարում է, որ պետք է «կողմերը որոշեն»…

Ի՞նչ է` Մոսկվային թվում է, թե Հայաստանն ու Արցախը մի «գեղեցիկ» օր կարող է Ալիևի հետ քննարկեն Լեռնային Ղարաբաղին` Ադրբեջանի կազմում «ինքնավարություն» ստանալու հարցը: