Մեկին կերակրիր, մյուսի տակդիրը փոխիր. Նելլին՝ երկրորդ երեխայի ծնունդի մասին

2 Նոյեմբեր, 2016 13:48

Օրեր առաջ Life.panorama.am-ը պատմեց, որ երգչուհի Նելլին պատրաստվում է երկրորդ անգամ մայրանալ: Մեզ հետ զրույցում երգչուհին նշել էր, որ բալիկը պետք է ծնվի հոկտեմբերի վերջին, սակայն երկու օր անց` հոկտեմբերի 17-ին, Նելլիի դուստը անակնկալ մատուցեց ու լույս աշխարհ եկավ:

Նորածին Սառան արդեն երջանկությամբ է լցրել Նելլիի ընտանիքը, իսկ երգչուհին այս անգամ Life.panorama.am-ին պատմել է երկու երեխաների մայր լինելու հետ կապված հաճելի հոգսերից.

«Սառան լույս աշխարհ եկավ իր ժամկետի մեջ, այնքան էլ շուտ չէր, բայց ամեն դեպքում դեռ ժամանակ կար, ինչեւէ` այնքան ակտիվ հղիություն եմ ունեցել, որ նորմալ էր բալիկիս` մի քանի շաբաթ շուտ ծնվելը», - նշեց երգչուհին ու հավելեց.

«Ես ու ամուսինս արդեն մոռացել էինք, թե ինչպիսին է կյանքը, երբ տանդ նորածին ունես, հիմա արդեն վերհիշեցինք ու մեծ հաճույքով գլուխ ենք բերում փոքրիկի հետ կապված հարցերը: Մենք հիմա ապրում ենք շատ երջանիկ օրեր, մեր գեղեցիկ ընտանիքում իսկական տոն է Սառայի ծնունդից հետո»:

Նելլիին երկու երախաների մայր լինելու հետ կապված հոգսերը չեն վախեցնում.

«Շատ դժվար է մեր առօրյան. Առավոտյան, երբ արթնանում ենք, մեկը լացում է, մեկը շտապում է մանկապարտեզ, մեկին կերակրիր, մյուսի տակդիրը փոխիր... սակայն ես մեծ հաճույքով եմ այդ բոլորն անում, քանի որ հենց ընտանեկան երջանկությունը նաեւ նման հոգսերի մեջ է»,- նշեց նա:

Սառայի ավագ քույրը` Անահիտը, մայրիկի խոսքով եւս մասնակից է լինում քույրիկի խնամքին:

«Ավագ աղջիկս շատ է սիրել քույրիկին, ինչպես յուրաքանչյուր երեխա, նա էլ կարծում է, որ Սառան տիկնիկ է ու անընդհատ համբուրում է ու գրկում: Ես էլ փորձում եմ մշտապես Անահիտին մասնակից դարձնել մեր փոքրիկի խնամքի գործերին, ինչից իրեն շատ լավ է զգում»,- նկատեց Նելլին:

Մեկ ամսից Նելլին կվերադառնա աշխատանքի, դեկրետային դադար երգչուհին չի ունենա.

«Մեկ ամսից կվերադառնամ աշխատանքի, քանի որ «Biayni by Vahan khachatryan» բուտիկը պատրաստվում է իր ձմեռային նոր հավաքածուն ցուցադրել, եւ ես, որպես ընկերության մենեջեր, պարզապես դեկրետի ժամանակ չունեմ»,- նշեց երգչուհին, իսկ հարցին, թե աշխատանքի վերադառնալով ու բալիկին շատ ժամանակ չհատկացնելով մեղավորություն չի՞ զգումարդյոք, պատասխանեց.

«Ինձ մեղավոր չեմ զգում, քանի որ եթե օրվա որոշակի ժամեր աշխատում ես ու բալիկին վստահում ես դայակին, դա դեռ չի նշանակում, որ քիչ ժամանակ ես տրամադրում երեխային: Ես աշխատել եմ միշտ եւ ինքս ինձ առանց աշխատանքի չեմ պատկերացնում: Իսկ բալիկս խնամքի, սիրո պակաս երբեք չի ունենա, քանի որ Անահիտն էլ երբեք իրեն միայնակ չի զգացել: Ես ու ամուսինս փորձում ենք կարգավորել մեր ժամերը բալիկների հետ անցկացնելու համար, մեր երկուսի համար էլ ընտանիքն առաջին տեղում է»:

Հեղինակ` Անուշիկ Մելքոնյան