Կոնֆլիկտներ, պայքար և սեր. մեկնարկում է «Ցանկալի փեսացուն» նախագիծը

«Ucom» ցանցում գործող «Արմենիա Պրեմիում» հեռուստաալիքի եթերում այսօր՝ ժամը 21։00-ին, կմեկնարկի «Ցանկալի փեսացուն» ռեալիթի շոուն, որի շրջանակներում 12 աղջիկ կպայքարեն դերասան Սոս Ջանիբեկյանի սիրտը գրավելու համար։

Նախագծի պրոդյուսեր Հրաչ Քեշիշյանը BlogNews-ի հետ զրույցում նշել է, որ ցանկալի փեսացուին՝ Սոս Ջանիբեկյանին, ընտրել են պրոդյուսերական խմբի անցկացրած վերլուծությունից՝ սոցհարցումների, սոցցանցերի, գլամուրային հեղինակային ամսագրերի մոնիթորինգից հետո։

Սոս Ջանիբեկյանն էլ նշել է, որ իր համար բարդ էր համաձայնելը, քանի որ մի շարք մտավախություններ է ունեցել։ «Ինձ համար շատ-շատ-շատ դժվար էր որոշում կայացնելը, որովհետև ինձ հաճելի չէ, երբ անձնական կյանքս ու հարաբերություններս և, առհասարակ, կին-տղամարդ հարաբերությունները լինում են հանրային, սակայն սա շոու է։ Ինձ իսկապես հետաքրքիր էր Հայաստանում տեսնել այդ համարձակ աղջիկներին։ Սա ինձ համար մի տարածություն է, որտեղ ես հեռուստադիտողներին կներկայանամ էնպիսին, ինչպիսին կյանքում եմ։ Աղջիկների հետ կշփվեմ այնպես, ինչպես իրականում»,- ասաց դերասանը։

Նշենք, որ նախագծում բավականին թեժ պայքար է ընթանում՝ համեմված աղջիկների կոնֆլիկտներով ու պայքարի մեթոդներով։ Այս առիթով Հրաչ Քեշիշյանը նշեց, որ տեսախցիկներն աշխատում են մինչև ուշ գիշեր. «Բնականաբար, կան նաև շատ հետաքրքիր, ինտրիգային, սուր պահեր։ Ես համոզված եմ, որ որքան մոտենա ավարտը, այնքան ավելանալու են ինտրիգները»։

Նյութը՝ Ամալյա Հովհաննիսյանի

Լուսանկարները՝ Կարեն Գրիգորյանի