Աբովյանում դանակահարված «Օլե» գիշերային ակումբի տնօրենը հիվանդանոցում մահացել է

Աբովյանում հոկտեմբերի 31-ին դանակահարված «Օլե» գիշերային ակումբի տնօրենն այսօր՝ նոյեմբերի 8-ին, Երեւանի «Սուրբ Գրիգոր Լուսավորիչ» հիվանդանոցում մահացել է: Այս մասին NEWS.am-ին տեղեկացրին հիվանդանոցից:  31-ամյա Մամիկոն Գրիգորյանը դանակով վնասվածք էր ստացել գլխի շրջանում, բժիշկները 8 ժամ տեւած վիրահատության միջոցով էին կարողացել հեռացնել դանակը նրա գլխից:

Ավելի վաղ ՀՀ քննչական կոմիտեի մամուլի ծառայությունից հայտնել էին, կյանքի համար վտանգավոր մարմնական վնասվածքը տղամարդուն պատճառվել է Աբովյան քաղաքում գործող ակումբներից մեկի մոտ՝ հաճախորդներից մեկի կողմից։ Պարզվել է նաեւ շարժառիթը, առերեւույթ հանցագործություն կատարած անձի ինքնությունը եւ հանձնարարություն է տրվել ոստիկանության համապատասխան ստորաբաժանումներին միջոցներ ձեռնարկել՝ նրան հայտնաբերելու եւ վարույթն իրականացնող մարմնին ներկայացնելու համար։

Կատարվել է դեպքի վայրի զննություն, հարցաքննվել մի շարք վկաներ, առգրավվել հանցագործության գործիք հանդիսացող դանակը, քրեական գործով էական նշանակություն ունեցող մի շարք հանգամանքներ պարզելու համար նշանակվել փորձաքննություններ։

ՀՀ քննչական կոմիտեի Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի (դիտավորությամբ առողջությանը ծանր վնաս պատճառելը) հատկանիշներով, ձեռնարկվել անհրաժեշտ անհետաձգելի գործողություններ տղամարդու՝ մարմնական վնասվածք ստանալու հանգամանքները պարզելու ուղղությամբ։