Վարչապետ. ՀՀ ազգային վիճծառայության առջեւ մաքսիմալ օբյեկտիվ եւ անկախ լինելու խնդիր է դրված

ՀՀ ազգային վիճակագրության ծառայության առջեւ մաքսիմալ օբյեկտիվ եւ անկախ լինելու խնդիր է դրված: Այս մասին, այսօր՝ նոյեմբերի 10-ին, Ավստրիայի ազգային վիճակագրական ծառայության գլխավոր տնօրեն Կոնրադ Պեսենդորֆերի հետ հանդիպման ժամանակ նշել է ՀՀ վարչապետ Կարեն Կարապետյանը:

Կառավարությունից NEWS.am-ին հայտնում են, որ վարչապետը կարեւորել է պաշտոնական վիճակագրության դերը որոշումների կայացման գործում եւ արդյունավետ համարել Հայաստանի ու Ավստրիայի ազգային վիճակագրական ծառայությունների համագործակցությունն ինչպես երկկողմ, այնպես էլ բազմակողմ ձեւաչափով: Նշելով, որ յուրաքանչյուր հարթակ կարեւոր է մասնագիտական շփումների, փորձի փոխանակման համար՝ Կարեն Կարապետյանն օգտակար է համարել Եվրոպական միության աջակցությամբ ՀՀ վիճակագրական համակարգում ԵՄ չափանիշների ներդրումը, ինչպես նաեւ ԵՄ Թվինինգ ծրագրի շրջանակում ներկայում շարունակվող աշխատանքները:

Կոնրադ Պեսենդորֆերը շնորհակալություն է հայտնել ընդունելության համար եւ ՀՀ վարչապետին փոխանցել Ավստրիայի կանցլերի ջերմ ողջույնները: Նրա խոսքով՝ ՀՀ ԱՎԾ հետ տեւական արդյունավետ համագործակցության փորձ է կուտակվել, այդ թվում նաեւ՝ Եվրոպական վիճակագիրների ասոցիացիայի շրջանակում: Ավստրիայի ԱՎԾ-ի գլխավոր տնօրենը տեղեկացրել է, որ եվրոպական վիճակագրական համակարգի նոր  զարգացումների ներքո մշակվում են վիճակագրական գործիքակազմի կիրառման նոր չափանիշներ, որոնց նպատակն օբյեկտիվ, անկողմնակալ եւ գիտական մտքի զարգացմանը համահունչ վիճակագրական համակարգի ձեւավորումն է:

Ողջունելով նախատեսվող բարեփոխումները՝ կառավարության ղեկավարը նշել է, որ քայլեր են կատարվում նաեւ ՀՀ վիճակագրական համակարգի արդիականացման ուղղությամբ: Վարչապետի խոսքով՝ ՀՀ ազգային վիճակագրական ծառայության առջեւ մաքսիմալ օբյեկտիվ ու անկախ լինելու խնդիր է դրված, քանի որ հանրային վստահության ապահովման համար անհրաժեշտ է ինֆորմացիոն աղբյուրների եւ ելակետային տվյալների հավաստիություն: Հաշվի առնելով օբյեկտիվ վիճակագրական տվյալների կարեւորությունը որոշումների կայացման գործում՝ Կարեն Կարապետյանը կարեւորել է վիճակագրական տվյալների քննարկման ժամանակ հետադարձ կապի ապահովումը, ինչը թույլ կտա հասկանալ ելակետային ինֆորմացիայի սխալմունքի հավանականությունը եւ հնարավորինս բացառել դա: