Ի՞նչն է Սեյրան Օհանյանին տարել Ռազմական ոստիկանություն
Լևոն Մութաֆյանը ֆեյսբուքյան իր էջում գրում է.
Այն, որ պաշտպանության նախարար Սեյրան Օհանյանը սիրում է անակնկալ այցեր կատարել տարբեր զորամասեր օրվա տարբեր ժամերին՝ արդեն հայտնի է շատերին: Հետևաբար, ոչ ոք չի զարմանում, երբ առավոտյան վերկացին մարզահագուստով նախարարը բախում է որևէ զորամասի դուռ:
Սակայն անսպասելի, չծրագրավորված խորհրդակցություններ կազմակերպելու օրինակներն արդեն դառնում են զարմանալի: Դրանք նաև հաստատում են այն միտքը, որ նախարարը որդեգրել է մի նոր աշխատաոճ՝ այսպես կամենալով անակնկալի բերել ենթականերին, ծանոթանալ իրավիճակներին ոչ թե արդեն սրբագրված, անգիր սերտված զեկույցներով, այլ՝ համպատրաստի, ինչպես ասում են՝ տաք հետքերով:
Հունիսի 29-ին Ռազմական ոստիկանություն կատարած այցն էլ հենց այս համատեքստում էր և, ինչպես պարզվեց, նպատակ ուներ պարզելու մի շարք հարցեր, որոնք հետաքրքրում են հանրությանը: Հանդիպումը նախ հաշվետվության վերածվեց, որի ընթացքում ՌՈ պետ Սամվել Ղուկասյանը ներկայացրեց համակարգի կատարած աշխատանքները, արժևորեց այն ձեռքբերումները, որոնց հասել է այս կառույցը՝ աստիճանաբար ձեռք բերելով հանրային վստահություն, դառնալով բանակի կարևորագույն ստորաբաժանումներից մեկը:
Ամենակարևորն այն է, որ ՌՈ-ն զորամասերի հրամանատարների հետ ձևավորել է ակտիվ փոխգործակցություն, մշակել համատեղ աշխատանքային ծրագրեր, ՌՈ-ն պատժիչ կառույցից, ինչպես երկար ժամանակ ընկալվում էր, վերածելով բանակին աջակցող, հանցագործությունները բացահայտող, ինչպես նաև պրոֆիլակտիկ աշխատանքներ իրականացնող կառույցի: Սեյրան Օհանյանն իր խոսքում այս ամենն առաջընթաց դիտարկեց, դրվատեց ՌՈ պետի և անձնակազմի կատարած աշխատանքները:
Խորհրդակցության ընթացքում ռազմական ոստիկանության ենթակառուցվածքների ղեկավարները, սպաները պաշտպանության նախարարին են ներկայացրել տվյալ ժամանակահատվածում զորամասերում հանցագործությունների և պատահարների կանխարգելման ու նվազեցման, զինվորական կարգապահության ամրապնդման ուղղությամբ իրականացված լայնածավալ գործունեության արդյունքները:
Հայտնի է, որ բանակում հանցագործությունների մի զգալի մասը վերաբերում է միջանձնային հարաբերությունների խախտումներին, կանոնադրական նորմերի անտեսումների հետևանքով առաջացած իրավիճակներին, որոնք էլ հանցագործություններ են ծնում: Ինչպես նախարարը, այնպես էլ ՌՈ պետը խստորեն դատապարտել են առկա փաստերը, խոսել ամենակարևոր մի բացթողման՝ դաստիարակչական աշխատանքների ոլորտում տեղ գտած թերությունների, հասարակություն-բանակ կապի տակավին թույլ լինելու, դեկլարատիվ հայտարարույթունների մասին, որոնք որոշ դեպքերում շրջանառության մեջ դնելով որոշ հասարակական կառույցներ, այդպես էլ չեն ցանկանում վերածել փոխգործակցության, համատեղ ծրագրերի իրականացման:
Հատկապես դպրոցում, հանրային շրջանակում դաստիարակչական աշխատանքների պակասն է ծնում միջանձնային հարաբերույթունների խախտումները, որոնք էլ երբեմն ծանր հետևանքներ են ունենում: Իհարկե, ինչպես նշվեց խորհրդակցության ժամանակ, կատարվում են արդյունավետությանը բարձրացմանն ուղղված աշխատանքներ, օրավուր փոխվում են մի շարք մոտեցումներ, հին մտածելակերպին, մաշված դաստիարակչական մեթոդներին փոխարինելու են գալիս նորերը, սակայն դեռ կատարվածն ամբողջապես բավարարող չէ: Անշուշտ, պետք է հուսալ, որ նման խորհրդակցությունները շատ բան կփոխեն համակարգում, նաև կբարելավեն ՌՈ գործունեությունը:
Սեյրան Օհանյանը հատկապես մեծ ուշադրություն է դարձրել ամառային զորակոչի աշխատանքների ճշգրիտ կազմակերպմանն ու գործընթացների թափանցիկությանը, անաչառությանը: Տրվել են համապատասխան ցուցումներ: Զորակոչի շրջանակներում այս խնդիրների կարևորումը փաստում է այն մասին, որ Սեյրան Օհանյանն էլ տեղյակ է այն ամենին, ինչը տեղի է ունենում որոշ զինվորական կոմիսարիատներում:
Կոռուպցիան և կաշառակերությունը տակավին հաղթահարված չեն, տակավին չեն ձերբազատվել կեղծ բժշկական հիմնավորումներից, առողջ զինակոչիկներին հիվանդ ներկայացնելու, կամ էլ հիվանդներին ամեն գնով բանակ ճանապարհելու ,,մեթոդաբանությունից,,: Վերջին շրջանում տեղի ունեցած բացահայտումները, որոշ բժիշկների հայտնվելը ճաղերի հետևում, անընդհատ հնչող դժգոհությունները խոսուն վկայություններն են այդ ամենի:
Ուրեմն, պետք է պայքարել այս ամենի դեմ, անել այնպես, որ բանակում ծառայությունը վերածվի ոչ թե պատի, այլ պարտքի ու պատասխանատվության, հպարտության:
1
2
3
4
5
1
3
4
5
1
2
3
5
