Հնարավոր է, որ քիմիական հսկան ոտքի կանգնի
Հասարակություն
ՀՀ էներգետիկ ենթակառուցվածքների և բնական պաշարների նախարարությունը մինչև հունվարի 20–ը հայտարարել է մրցույթ մասնավոր ներդրողի ներգրավմամբ «Նաիրիտ գործարան» ՓԲԸ արտադրական ենթակառուցվածքների վերագործարկման նպատակով։ Հայրենական ապրանքարտադրողների միության նախագահ Վազգեն Սաֆարյանի կարծիքով` կառավարության հայտարարությունն արդեն իսկ ողջունելի է, իսկ նրանք, ովքեր զբաղվել են գործարանի հարցով, պետք է առաջարկություններ ներկայացնեն:
«Ես, որպես միության նախագահ, նույնպես պետք է ներկայացնեմ, թե մեր կարծիքով ի՞նչ ճանապարհով է կարելի այդ գործարանը վերագործարկել և հետամուտ կլինեմ, որ մեր ներկայացրած առաջարկն արժանանա քննարկման: Այնպես որ, սա է ճիշտ ճանապարհը»,– ասում է Վ. Սաֆարյանը: Կազմակերպության ղեկավարն ասաց նաև, որ «Նաիրիտով» զբաղվել է 2000 թ.–ից և իր կարծիքով, բոլոր հնարավորությունները կան, որպեսզի գործարանը ոչ միայն վերագործարկվի, այլև շահույթով աշխատի:
«Մենք մասնագետների հետ խորհրդակցել ենք և ըստ նրանց հաշվարկների` գործարանի շահագործումից հնարավոր է տարեկան մոտավորապես 100–120 միլիոն դոլար համախառն ներքին արդյունք ստանալ: Սա նշանակում է, որ «Նաիրիտը» շահույթով աշխատելու հնարավորություն կունենա»,– ասում է Վ. Սաֆարյանը:
Հարցին, թե այդ դեպքում ինչու է կառավարությունն արդեն երկար տարիներ փորձում համոզել հասարակությանը, որ «Նաիրիտը» վերագործարկելը անարդյունավետ ու պարապ զբաղմունք է, միության նախագահն ասաց, որ «Նաիրիտի» հարցով զբաղվող մարդկանց երկու խումբ կա. մի մասն ուզում է, որ գործարանն աշխատի, իսկ մյուս մասը դա չի ուզում: Ինքն այն խմբից է, ովքեր վստահ են, որ քիմիական հսկայի վերագործարկման հարցի դրական լուծման դեպքում գործարանը միանշանակ շահույթով է աշխատելու:
«Այն մոնոպոլ կարգավիճակը, որն ունի «Նաիրիտ» գործարանը, պետք է օգտագործել և մեր արտադրանքով դուրս գալ շուկա: Դա շատ կարևոր է ոչ միայն մեր երկրի ներքին տնտեսական հարցերը լուծելու, այլև արդյունաբերության զարգացման համար: Իսկ եթե կան մարդիկ, ովքեր ուզում են, որ Հայաստանում արդյունաբերություն չլինի, ապա դա թողնենք իրենց խղճին: Ինչ վերաբերում է կառավարությանը, ապա եթե վստահ չլիներ, նման հայտարարություն չէր անի և պետք է ոչ միայն ողջունել նման մոտեցումը, այլև աջակցել գաղափարի իրականացմանը»,– ասաց Վ. Սաֆարյանը:
Նարե Գրիգորյան
1
2
3
4
5
2
3
4
1
2
3
4
5
