Կարեն Կարապետյանին սպասելիս

Հինգշաբթի օրը կայացած Հանրապետական կուսակցության Գերագույն մարմնի նիստի ավարտին լրագրողների հետ ասուլիսում կուսակցության մամլո խոսնակ Էդուարդ Շարմազանովը մասնավորապես հայտարարեց, որ անկուսակցական քաղաքական գործիչները ապագա չունեն, իր խոսքով Շարմազանովը նշեց նաև, որ «Իմ կուսակցությունը, իմ ժողովուրդն է» կարգախոսը անցած դարին է վերաբերում և այլևս արդիական չի կարող լինել։ Հետաքրքիր էր Շարմազանովի նշած անկուսակցական գործիչները ապագա չունեն վերջնագրային պնդումը։ Համաձայն այս պնդման, առավելագույնը մինչև 2017 թվականի ապրիլը պարզ կլինի, թե ովքեր են ներկայի կառավարության կազմից անդամակցելու ՀՀԿ–ին։ Այս մասին արդեն իսկ հայտարարել է Վիգեն Սարգսյանը, նման զարգացումը չի բացառել մշակույթի նախարար Արմեն Ամիրյանը։ Սակայն հասկանալի է, որ առավել սպասված է վարչապետ Կարեն Կարապետյանի որոշումը։ Մի քանի օր շարունակ հայկական լրատվամիջոցներում և այլ հարթակներում շարունակաբար պտտվում է այն հարցը, թե կանդամակցի՞ վարչապետը ՀՀԿ–ին թե ոչ։

Ի դեպ, այս հարցը բավական խորքային խնդիրների հետ է առնչվում, քանի որ Շարմազանովի մեկ այլ հայտարարությամբ Հանրապետականը մեկ լիդերի կուսակցություն է և այդ լիդերը Սերժ Սարգսյանն է, որն էլ կընտրվի կուսակցության նախագահ։ Անշուշտ, փոքր–ինչ զարմանալի է Շարմազանովի այս բացահայտ պնդումը և միաժամանակ գնահատելի անկեղծությունը, քանի որ գոնե ֆորմալ առումով որևէ ընտրությունից առաջ՝ ներկուսակցական կամ պետական, սովորաբար ենթադրվող ընտրվածների անունները չեն տալիս։

Սակայն սա մի կողմ։ Շարմազանովի այս հայտարարությունների ֆոնին պարզ չի դառնում, թե անդամակցելով ՀՀԿ–ին, ինչ դիրք է գրավելու վարչապետ Կարեն Կարապետյանը՝ դառնալո՞ւ է արդյոք կուսակցության սովորական անդամ, թե այնուամենայնիվ դառնալու է կուսակցության ներսում Սերժ Սարգսյանի ճամբարի առանցքային կերպար։ Այն, որ հանրապետական կուսակցության ներսում առկա է այդ ճամբարային բաժանումը, դժվար է գաղտնիք համարել, և այս տեսանկյունից Պաշտպանության նախարարի անդամակցությունը ՀՀԿ–ին բնականաբար միտված է Սերժ Սարգսյանի ներկուսակցական թիմի ուժեղացմանը։

Ամեն դեպքում ներկայի իրավիճակը դեռևս սպասողական է, քանի որ Հանրապետական կուսակցությունը, իսկ ավելի շուտ կուսակցության սարգսյանական թիմն արտահայտել է իր դիրքորոշումը։ Այժմ արդեն Կարեն Կարապետյանի քայլերից է կախված, թե ինչպիսի քաղաքական ապագա կունենա ինքը։ Իսկ այդ քաղաքական ապագան որոշվում է հետևյալ կերպ՝ եթե վարչապետը այնուամենայնիվ չի անդամակցում ՀՀԿ–ին, ապա նա ապագա չունի՝ Շարմազանովի հայտարարության համաձայն և դառնում է ընդամենը 6 ամսվա վարչապետ, իսկ եթե Կարեն Կարապետյանն անդամակցում է ՀՀԿ–ին, ապա այստեղ առաջ է գալիս այն հարցը, թե ինչ պայմանով է նա դառնում հանրապետական և ըստ էության, հենց այս պայմանից է կախված լինելու Կարեն Կարապետյանի ապագան։ Այս հարցի պատասխանը մեծ հաշվով սարերի հետևում չէ, քանի որ խորհրդարանական ընտրություններին մնացել է ընդամենը 4 ամիս և առավելագույնը այս ժամանակահատվածում որոշակի հստակություն կլինի ոչ միայն իշխանության ներսում, այլև ընդհանրապես Հայաստանի քաղաքական դաշտում ընթացող խմորումների շուրջ։