Ադրբեջանում մտավորականությունը վրդովված է Հեյդար Ալիեւի հուշարձանը «նախշած» ակտիվիստի կալանքից

Ադրբեջանում մտավորականությունը վրդովված է Ղիյաս Իբրահիմովի դեմ դատավճռի կապակցությամբ, որը 10 տարվա ազատազրկման է դատապարտվել Հեյդար Ալիեւի հուշարձանի վրա կատարած գրառման համար։

Հիշեցնենք, որ երիտասարդը արձանի վրա գրել էր «ստրուկների  տոն» արտահայտությունը։ Դա յուրօրինակ բառախաղ է. QUL BAYRAMI՝ ստրուկների տոն, որը Իբրահիմովը գրել էր ծաղիկների օրվա կապակցությամբ՝ GÜL BAYRAMI։

Գրող Չինգիզ Հուսեյնովի հղած բաց նամակում արտահայտված է ինչպես իշխանությունների, այնպես էլ հասարակության կարծիքը. «Մի՞թե մեզ մոտ վերջնականապես կորել է արդարության, կարեկցանքի տարրական զգացումը։ Կամ զրկվել ենք վախը հաղթահարելով խիզախություն հավաքելու ու ոչ ասելու ունակությունից։ Ոչ թե զայրույթի բողոք ցուցարարների բազմության մեջ, այլ գոնե շփոթություն։ Այո, տարրական շփոթություն, թե ինչպե՞ս դա կարող էր պատահել։ Դատարանը երիտասարդին 10 տարվա ազատազրկման է դատապարտում, ավելի ճիշտ՝ սպանության ակտ է կատարում։ Իսկ ինչի՞ համար են նման հրեշավոր պատիժ սահմանել։ Միայն այն բանի, որ նա՝ այդ երիտասարդ տղան, համարձակվել է Հեյդար Ալիեւի արձանի վրա 2 բառ գրել։

Այո, երիտասարդը գեղագիտական նորմերի տեսանկյունից զանցանք է կատարել, քանի որ փչացրել է պատվանդանը, թեպետ կարող էր բողոքը հայտնել օրինական միջոցներով, օրինակ, մամուլում գրառում կատարել, փառք աստծու ընդդիմադիր պարբերականներ կան։ Բայց Ղիյասը այլ ուղի ընտրեց՝ սկանդալային, ոչ քաղաքակիրթ։ Նորմալ երկրում նման դեպքում իրավապահները ձերբակալում են իրավախախտին, տուգանում, ստիպում մի քանի շաբաթ հանրօգուտ աշխատանք կատարել։ Բայց ոչ, իշխանությունները գնացին նախապես մշակած ճանապարհով, որը շատ հեռու է նորմալ եւ օրինական լինելուց, ընտրեցին բռնաճնշումների ուղին։ Կալանավորել, դատել, խեղդել բողոքի ալիքը, վախեցնել դժգոհներին, սպառնալ պատժով, որպեսզի ոչ ոք չհամարձակվի ծպտուն հանել»,– ասված է գրողի նամակում, փոխանցում է contact.az–ը։