Իրաքյան Քուրդիստանի և Թուրքիայի վարչապետները հանդիպել են Անկարայում (տեսանյութ)
HeaderԻրաքյան Քուրդիստանի վարչապետ Նեչիրվան Բարզանին և Թուրքիայի վարչապետ Բինալի Յըլդըրըմը հանդիպում են ունեցել Անկարայում: Այս մասին գրում է թուրքական «Անադոլու» գործակալությունը:
Դռնփակ հանդիպումից հետո լրագրողների հետ հանդիպում չի անցկացվել: Նշվում է, որ վարչապետների հանդիպումը տևել է մոտ մեկ ժամ:
Կողմերը քննարկել են հիմնականում Իրաքի Մոսուլ շրջանում իրաքյան բանակի և միջազգային կոալիցիոն ուժերի կողմից իրականացվող ռազմական գործողությունները:
Հոկտեմբերի 17-ին իրաքյան բանակը քրդական ջոկատների հետ համատեղ սկսել է «Իսլամական պետություն» ահաբեկչական խմբավորումից Մոսուլի ազատագրման գործողությունը:
Հիշեցնենք, որ հոկտեմբերի 12-ին Իրաքի կառավարության մամուլի ծառայությունը պաշտոնական հայտարարություն էր տարածել ի պատասխան Թուրքիայի նախագահ Ռեջեփ Թայիփ Էրդողանի այն հայտարարությունների, թե Իրաքի Բաշիքա շրջանում գտնվող թուրքական ռազմական ճամբարը տեղակայվել է Իրաքի իշխանությունների խնդրանքով:
«Թուրքիայի նախագահ Ռեջեփ Թայիփ Էրդողանի այն պնդումները, թե Իրաքի վարչապետ Հեյդար ալ Աբադին Անկարա այցի ժամանակ խնդրել է Թուրքիային Իրաքի Բաշիքա շրջանում ռազմական ճամբար տեղակայել, անհիմն են»,- ասվում էր հայտարարության մեջ:
Իրաքի խորհրդարանը հոկտեմբերի 4-ին որոշում է ընդունել, որով երկրի Մոսուլ շրջանում թուրքական ԶՈՒ-ի իրականացնելիք ռազմական գործողություններն «անօրինական» են համարվում:
Թուրքիայի նախագահը, արձագանքելով Իրաքի խորհրդարանի և վարչապետի կողմից իրեն ուղղված քննադատություններին, անձնական վիրավորանքներ էր հասցրել Իրաքի վարչապետին:
1
2
3
4
5
1
2
3
4
1
2
