Սա երկիր է՞, թե որբի գլուխ, հարցնում է Վ. Բոստանջյանը
Վերլուծություն
Տնտեսագիտության դոկտոր Վարդան Բոստանջյանի կարծիքով հայաստանյան խոշոր ընկերությունների սնանկացման խնդիրները որքան էլ փնտրենք ընկերության վատ աշխատանքի մեջ, պետք է նաև հասկանալ, թե ինչպես է պատահում, որ պետությունը չի կարողանում իր տնտեսվարող սուբյեկտի համար այնպիսի պայմաններ ստեղծել, որ այն կործանվելու փոխարեն դուրս գա ճգնաժամից:
«Խնդիրը պետք է դիտարկել ոչ թե միջանձնային մակարդակում, այլ՝ տնտեսվարող–իշխանություններ հարթությունում: Տեսականորեն կարելի է պատկերացնել, որ նոր մոտեցումներն այնքան խիստ կարող են լինել, որ հանրապետությունում այլևս տնտեսվարող սուբյեկտ չի մնա: Այդ պարագայում ինչպե՞ս պետք է պետական բյուջեի մուտքերն ապահովել: Պետք չէ թույլ տալ, որ երկրում խոշոր և կայացած ընկերությունները փակվեն»,– ասում է Վ. Բոստանջյանը:
Տնտեսագետի կարծիքով պետք է այնպես անել, որ մի կողմից հնարավոր լինի ընկերությունների ախորժակը «զսպել», մյուս կողմից էլ թույլ չտրվի, որ ընկերությունները սնանկանան:
«Ցանկացած ընկերության սնանկացմանը հետևում է աշխատատեղերի և ապրանքաշրջանառության կրճատումը, շուկայում գների թանկացումը և այլն: Սնանկացման եզրին հասցնելուց առաջ պետք է համապատասխան պետական մարմիններն այդ մասին զգուշացնեն ընկերություններին և ցուցումներ տան ընկերությանը: Երկիր է չէ՞ վերջ ի վերջո, ոչ թե որբի գլուխ, որ ով գա՝ սկսի այն սափրել»,– ասում է Վ. Բոստանջյանը:
Տնտեսագիտության դոկտորի կարծիքով նոր կառավարությունը երկիրը տնտեսապես կայունացնելու համար պետք է առաջնորդվի՝ նետվել և փրկել մոտեցմամբ, ինչպես ԱՄՆ իշխանությունները ժամանակին փրկեցին «Ջեներալ Մոթորս» ընկերությունը՝ նահանգային բյուջեից 30 տարով 1 միլիարդ դոլար անտոկոս վարկ տրամադրելով:
«Եվ եթե մեր իշխանությունները նման կերպ մտածեն, այդ դեպքում տնտեսվարող սուբյեկտները չեն վերանա, ինչն էլ իր հերթին հսկայական շղթայի անկման պատճառ չի հանդիսանա: Առանց այդ էլ մեր հանրապետությունում տնտեսական վիճակը շատ վատ է և այս կերպ շարունակելու դեպքում ներքին տնտեսական լարվածությունն է՛լ ավելի կմեծանա, բայց ես հույս ունեմ, որ նոր կառավարության անդամները լինելով կրթված և բանիմաց մասնագետներ կկարողանան երկիրը դուրս բերել այս իրավիճակից»,– ասում է Վ.Բոստանջյանը:
Արմինե Գրիգորյան
1
2
3
4
5
1
2
3
4
1
2
