Իրավական տեսանկյունից խնդրահարույց չէ, որ Կարեն Կարապետյանը շարունակի պաշտոնավարել. նախարար

Իրավական տեսանկյունից խնդրահարույց չէ, որ խորհրդարանական ընտրություններից հետո Կարեն Կարապետյանը շարունակի պաշտոնավարել: Այս մասին այսօր` նոյեմբերի 26-ին, լրագրողների հետ զրույցում ասաց ՀՀ արդարադատության նախարար Արփինե Հովհաննիսյանը` պատասխանելով այն հարցին, թե արդյոք Կարեն Կարապետյանը Սահմանադրությամբ իսկապես կարող է պաշտոնավարել:

«Իրավական տեսանկյունը շատ ավելի պարզ է, քան դուք պատկերացնում եք: Եթե Հանրապետության նախագահի խոսքին հետեւել եք, հետեւյալ շատ պարզ դատողությունն է պետք անել. եթե ՀՀԿ-ն ընտրություններից հետո հնարավորություն ստանա ձեւավորել Կառավարություն, ապա իրենց թեկնածուն կլինի Կարեն Կարապետյանը»,- ասաց Արփինե Հովհաննիսյանը:

Ինչ վերաբերում է 2018թ.-ից հետո ստեղծվելիք իրավիճակին, ապա Արփինե Հովհաննիսյանի խոսքով, խորհրդարանական մեծամասնությունը կձեւավորի իր կառավարությունը, իսկ եթե դա լինի ՀՀԿ-ն, ապա կառաջադրվի Կարեն Կարապետյանը:

Դիտարկմանը, թե վարչապետ առաջադրվելու համար հարկավոր է նախ պատգամավոր ընտրվել, իսկ դրա համար հարկավոր է վերջին 4-5 տարին մշտապես ապրել Հայաստանում, նախարարն արձագանքեց. «Կա իրավասու մարմին, որին ՀՀԿ-ն կներկայացնի իր ցուցակը համապատասխան Սահմանադրությամբ առաջադրված չափանիշներին: Ոչ թե պետք է պատգամավոր ընտրվես, որ հետո դառնաս, այլ որոշակի պահանջներ կան եւ դրանց համապատասխանությունը պետք է գնահատի իրավասու պետական մարմինը: Հիմա կանխավ կանխորոշել՝ ճիշը չէ»: