Վիգեն Սարգսյան․ Պաշտպանության ոլորտը օգտվում է Հայաստանի բոլոր քաղաքական ուժերի աջակցությունից

 Պաշտպանությունն այն ոլորտն է, որը օգտվում է Հայաստանի բոլոր քաղաքական ուժերի աջակցությունից։ Այս մասին նոյեմբերի 26-ին ՀՀԿ 16-րդ համագումարից հետո մամուլի ասուլիսի ժամանակ ասել է ՀՀ պաշտպանության նախարար Վիգեն Սարգսյանը։

Այսօր, նրա խոսքով, ամենակարեւոր խորհուրդներից մեկը, որը պարունակվում էր Հայաստանի նախագահ, ՀՀԿ ղեկավար Սերժ Սարգսյանի ելույթում, այն էր, որ պաշտպանությունը դառնում է մեր երկրի առանցքային խնդիրներից մեկը։ «ԻՄ պաշտոնավարության ընթացքում եղել են առիթներ (լինի դա ԱԺ-ում բյուջեի՝ իսկ հետո էլ իմ առաջարկած օրինագծի քննարկումների ժամանակ) հասկանալու, որ պաշտպանությունն այն ոլորտն է, որտեղ մենք օգտվում ենք ԱԺ-ում ներկայացված բոլոր քաղաքական կուսակցությունների, բոլոր քաղաքական ուժերի աջակցությունից։ Հետեւաբար, մենք շատ մեծ անելիքներ ունենք։ Ես վճռական են տրամադրված այդ աշխատանքի արդյունավետ իրականացում ապահովելու հարցում»,- նշել է Վիգեն Սարգսյանը։ Եվ «ազգ- բանակ» գաղափարախոսությունը, շարունակեց նա, իրականում մեզ համար դառնում է աշխատանքի առանցքային ուղղություն։ «Դա նշանակում է, որ մենք կանենք ամեն ինչ, որպեսզի մեր զինված ուժերը դառնան ավելի թափանցիկ, ավելի հասկանալի, վայելեն համընդհանուր հարգանք, որպեսզի զինծառայողների նկատմամբ լինի ոչ միայն սեր, այլեւ խորը վստահություն ամբողջ սպայական կազմի ու ընդհանուր բանակի նկատմամբ»,- ամփոփել է նախարարը։