Ազգուտակով՝ պաշտոնյա. Սերժ Սարգսյան

«Ազգուտակով՝ պաշտոնյա» շարքի այսօրվա հերոսը նախագահ Սերժ Սարգսյանն է: Նրա կինը՝ Ռիտա Սարգսյանը, երաժշտության ուսուցչուհի է, երգեր է գրում, համագործակցում Ավետ Բարսեղյանի եւ մյուս հայտնի երաժիշտների հետ: Երաժշտական կարիերայից բացի՝ սիրում է մասնակցել տարատեսակ միջոցառումների, զբաղվում է բարեգործությամբ: Վերջերս նա հայտնվել էր քննադատությունների թիրախում, քանի որ Արյունաբանության կենտրոնի բացման արարողության ժամանակ կիսատ-պռատ, կոտրած հայերեն, ռուսերենի կիրառությամբ աչքի ընկավ: Մտերիմներից տեղեկացանք, որ նախագահը հակված չէ իրեն բարեկամներով շրջապատել, բոլորին անխնա պաշտոն տալ: Այդ հարցերով առավել ակտիվ է նրա կինը: «Բայց Սերժը նեղ վիճակում գտնվող բարեկամներին ձեռք է մեկնում ու անսպասելի: Նրանցից ոչ մի սպասելիք չունենալով: Սերժը իր հոր պես արտակարգ հիշողություն ունի, մանկության տարիների ամենափոքր բանն անգամ հիշում է, թե որ բարեկամը էսինչ թվին ինչ ասաց, ով եկավ իրենց տուն: Ինքը հարազատության մեջ շատ զգայուն է, եթե մեկը պաշտոն է ուզում, ասում է՝ դու դրա համար չես ստեղծված, գնա քո գործը արա: Հարյուր մարդ գիտեմ, որ դիմել են հազար անգամ, չի օգնել, մինչև ինքը չհամոզվի, որ դիմողը իրոք վատ վիճակում է, օգնություն է պետք»,-պատմեց նրա հարազատներից մեկը` հավելելով, որ երեք եղբայրների մեջ ամենատակտովը Սերժ Սարգսյանն է, բայց նրա հետ հանդիպելը բարդ է:

Դուստրերը եւ խնամիները

Նախագահն ունի երկու դուստր՝ Անուշն ու Սաթենիկը: Անուշը մասնագիտությամբ իրավաբան է, նրա ամուսինը մեդիամագնատ, Վատիկանում Հայաստանի դեսպան Միքայել Մինասյանն է, ով հայտնի փիլիսոփա Միքայել Մինասյանի թոռն է Միքայել Մինասյանի եղբայրը՝ Գրիգոր Մինասյանը, AM իրավաբանական ընկերության կառավարիչ բաժնետեր, Երեւանի ավագանու անդամ: Նրանց հայրը՝ Արա Մինասյանը, «Սուրբ Գրիգոր Լուսավորիչ» հիվանդանոցի տնօրենն է, Երեւանի ավագանու ՀՀԿ անդամ, ում խոսքը որոշիչ է առողջապահության ոլորտում նշանակումների, ազատումների, պետական դոտացիաների հարցերով: Բոլորը գիտեն, որ ինքն «առաջինի խնամին է», հետեւաբար՝ իր հովանավորյալները անձեռնմխելի եւ արտոնյալ են: Միքայել Մինասյանի մայրական կողմը պակաս հայտնի չէ: Նրա քեռին՝ Գրիգոր Հասրաթյանը եղել է Երևանի ամենաերկարակյաց քաղաքապետը, ով մայրաքաղաքը կառավարել է 1962-1975 թվականներին, նրա անունով այժմ Երևանի Աջափնյակ վարչական շրջանում փողոց կա: Գրիգոր Հասրաթյանի միակ որդին՝ 70-ամյա ճարտարապետ Ռուբեն Հասրաթյանը համարվում է մի քանի հայտնի հուշարձանների ու շինությունների նախագծերի հեղինակ, կարճ ժամանակ եղել է Երեւանի գլխավոր ճարտարապետը, այնուհետեւ իշխանությունների հետ ունեցած անհամաձայնությունների արդյունքում հրաժարական է տվել:

Նախագահի մյուս դուստրը՝ Սաթենիկն ավարտել է Երևանի պետական համալսարանը` տնտեսագետի մասնագիտությամբ, որոշ ժամանակ աշխատել է դպրոցում: Նա ամուսնացած է ՍԴ նախագահ Գագիկ Հարությունյանի աներորդու՝ Հայկ Խաչատրյանի հետ: Նախագահի փեսայի մայրը` Ալիսա Ղազարյանը 2013թ մայրաքաղաքի «էլիտար դպրոցներից» մեկի` Վարդգես Պետրոսյանի անվան թիվ 51 դպրոցի տնօրենն է: Սերժ Սարգսյանը ունի 5 թոռնիկ՝ Մարիամը, Արան, Սերժը, Ռիտան և Տիգրանը:

Եղբայրները

Սերժ Սարգսյանն ունի երկու եղբայր՝ Լևոն և Ալեքսանդր Սարգսյանները։ Ալեքսանդր Սարգսյանը առավել հայտնի որպես Սաշիկ, մի շարք անեկդոտների մուսա է, թեւավոր խոսքերի հերոս՝ փայ մտնելու, բիզնեսներն իրենով անելու առումով, նա զբաղվում է գործարարությամբ, օլիգարխ է, ՀՀ Ազգային ժողովի նախկին պատգամավոր: Մամուլի տեղեկությունների համաձայն՝ Սաշիկ Սարգսյանին է պատկանում «ՄուլտիԼիոն» ընկերության բաժնետոմսերի 50 %-ը, գազալցակայաններ, շինարարական «Գլենդել Հիլզ» ընկերությունը, որի գործունեությունը 2011 թվականին հայտնվել էր ԱՄՆ իրավապահ մարմինների ուշադրության կենտրոնում, ավտոկայանման վճարովի համակարգը սպասարկող «Parking City Service» ընկերությունը, երբ ավտոկայանման վճարների 70 %-ը տարիներ ի վեր մնացել է «Parking City Service» ընկերությանը և միայն 30 %-ն է փոխանցվել քաղաքային բյուջե: Այժմ Կարեն Կարապետյանը հանձնարարել է այս հարցով վերանայումներ անել:

Սաշիկ Սարգսյանն ունի երկու որդի։ Կրտսեր որդին՝ Նարեկը նախկինում Աժ դաշնակցական պատգամավոր, լուսահոգի Վահան Հովհաննիսյանի փեսան էր, բաժանվելուց հետո ամուսնացավ «Հայաստան» տոնավաճառի սեփականատեր Փայլակ Հայրապետյանի թոռնուհու՝ Հասմիկի հետ: Այնուհետեւ տեղեկություններ շրջանառվեցին, թե Նարեկը էլի բաժանվել է: Շատերը կհիշեն, թե ինչպես Հյուսիսային պողոտայում հայտնվեց մի հսկայական ծադկեփունջ, որն իր նշանածին՝ Հասմիկին էր նվիրել Նարեկը: Ասում էին, թե ծաղկեփնջի արժեքը կարող էր հասնել մոտ 10 միլիոն ՀՀ դրամի:

Սաշիկ Սարգսյանի ավագ որդին՝ Հայկ Սարգսյանը տարիներ առաջ աշխատում էր Երևանի քաղաքապետարանի Քաղաքաշինության և հողի վերահսկողության վարչությունում որպես ավագ տեսուչ, այնուհետեւ դարձավ պետ: Մամուլը գրել էր, որ նրան քաղաքապետարանի այդ վարչություն են գործուղել հատուկ նպատակով. վերջինիս է վերապահված օլիգարխների և քրեական տարրերի կողմից ապօրինի զավթումների դեմ պայքարը:

Սերժ Սարգսյանի մյուս եղբայրը՝ Լեւոն Սարգսյանը, ԵՊՀ աստվածաբանության ֆակուլտետի Հայ եկեղեցու պատմության և եկեղեցաբանության ամբիոնի վարիչն է, Հատուկ հանձնարարություններով դեսպան: Նրա կինը Մալայանի անվան հիվանդանոցում է աշխատում, բժշկուհի է: Ունեն երկու զավակ: Որդին աշխատում է Կենտրոնական բանկում՝ որպես բաժնի պետ, ամուսնացած է իր կուրսեցու հետ, ով հասարակ ընտանիքից է:

Նշենք, որ Սերժ Սարգսյանի ծնողների տունը գտնվում է Ստեփանակերտի Տեղեցոնց կոչվող թաղամասում (այստեղ ժամանակին բնակություն են հաստատել Գորիսի Տեղ գյուղի բնակիչները)։ Հայրը՝ Ազատ Ավետիսի Սարգսյանը, դարբին է եղել, մահացել է 2013 թվականի դեկտեմբերի 16-ին: Մայրը վերջերս առողջական խնդիրներ ուներ, Երեւանում վիրահատվել է:

Հավելենք, որ մի հոդվածով հնարավոր չէ ներկայացնել նախագահի բոլոր հեռու-մոտիկ ընկերներին, նրա հովանավորությամբ բարձր պաշտոն զբաղեցնող բոլոր անձանց: Սերժ Սարգսյանը տարվա ընթացքում տասնյակ հարսանիքների քավոր է կանգնում, եւ բնականաբար իր բոլոր սանիկներին էլ տիրություն է անում: «Ազգուտակով պաշտոնյա» շարքի նախորդ հրապարակումներին կարող եք ծանոթանալ այստեղ:   

Նյութի աղբյուրը ` hraparak.am