Հայկական ատոմակայանի հնարավոր վթարի դեպքում առաջնային ռիսկի գոտում գտնվում են 25 համայնքներ
Հասարակություն
Հայկական ատոմային էլեկտրակայանի հնարավոր վթարի դեպքում առաջնային ռիսկի գոտում գտնվում են 25 համայնքներ, հաղորդում է «ԷկոԼուրը»:
Այդ համայնքներ են՝ Արմավիրի մարզում՝ Արմավիր, Մեծամոր քաղաքները, Արշալույս, Ակնալիճ, Առատաշեն, Աղավնատուն, Արագած, Արտաշար, Արեւիկ, Եղեգնուտ, Զարթոնք, Խորոնք, Ծաղկալանջ, Ծիածան, Հովտամեջ, Հայթաղ, Մայիսյան, Մրգաշատ, Նորավան, Գեղակերտ, Տարոնիկ, Ֆերիկ գյուղերը, Արագածոտնի մարզում՝ Արագածոտն, Նոր Ամանոս, Նոր Եդեսիա գյուղերը:
Այս համայնքների բնակչությանը պետք է տրամադրված լինեին անհատական պաշտպանության միջոցներ: «ԷկոԼուրը» պարզեց Մեծամոր եւ Արմավիր բնակիչների հետ զրույցներից, որ դա չի արվել:
Կառավարության որոշմամբ մարդկանց պետք է տրամադրվին վահանաձեւ գեղձի արգելափակման համար նախատեսված կայուն յոդի պատրաստուկներ, հակագազներ, դնչակալներ:
«Եթե կա ճառագայթման վտանգ, մարդը պետք է իմանա՝ ինչ է անելու, գոնե իմանա, որ պետք է իր դուռը, լուսամուտը փակի, մինչեւ փրկարարները գան, իր բնակարանից իրեն տանեն: Մեծամորում ոչ մեկը չի իմանում այդ մասին…
Մի անգամ եկել են, մի 15-20 հոգի տեղեկացել են, բայց դա չի նշանակում, որ ամբողջ բնակչությունն է տեղեկացված… Դպրոցներում վարժանքներ են անում, սակայն դա բավարար չէ, եւ պետք է մարզի լայն հասարակայնությունը իրազեկված լինի …»,- ասացին տեղի բնակիչները:
Ինչ վերաբերվում է ապաստարաններին, որոնք նախատեսված են կառավարության նույն որոշմամբ, ապա բնակիչները նշեցին, որ իրենց բնակավայրում նորմալ ապաստարաններ չկան: Որպես ապաստարան կարող են ծառայել նկուղները, բայց դրանք կամ վերածվել են աղբանոցի, կամ սեփականաշնորհվել են:
ՀԱԷԿ-ից մինչեւ 5 կմ հեռավորության վրա գտնվող համայնքների բնակչությունը վթարի մասին ազդարարվելու է ՀԱԷԿ-ից տրվող «Ճառագայթային վտանգ» ազդանշանի միջոցով: Բնակչության համար այս ազդանշանը պետք է հանդիսանա անհատական պաշտպանական միջոցների կիրառման, կայուն յոդի պատրաստուկների ընդունման եւ պատսպարման մասին հրահանգ:
1
2
3
4
5
1
2
3
4
5
1
2
3
4
5
