Բադալյանների հերթական աջակցությունը զոհված զինծառայողների ընտանիքներին
Հասարակություն
Նոյեմբերի 28-ին Երկրապահ կամավորների միությունում տեղի ունեցավ 2016 թվականին զոհված զինծառայողների ընտանիքներին դրամական օգնության հանձնման միջոցառում:
Բադալյանների ընտանիքի բարեգործական այս նախաձեռնությունն իրականացվում է արդեն երրորդ տարին անընդմեջ:
Ռոմիկ, Վահե և Վիգեն Բադալյանները, ովքեր հանդիսանում են «Կովկաս», «Ֆասթ կրեդիտ», «Վիվառո» ընկերությունների հիմնադիրներ, մեկական միլիոն դրամ նվիրաբերեցին 2016 թվականին զոհված զինվորականների ընտանիքներին, ներառյալ ապրիլյան պատերազմի ընթացքում զոհվածների, որոնց թիվն այս տարի հասել էր 129-ի:
Վահե Բադալյանը ելույթի մեջ նշեց, որ ցավոք, այս տարի զոհերի թիվն ավելացել է, բայց նրանք իրենց կյանքը նվիրաբերել են մեր բոլորիս երազած Հայաստանի համար: Նա հույս հայտնեց, որ 2017 թվականը կլինի խաղաղության տարի:
Դրամական օգնության հանձնումից հետո շնորհակալական խոսքով հանդես եկավ Կրթության և գիտության նախարար Լևոն Մկրտչյանը: Նախարարը Վահե Բադալյանին պարգևատրեց կրթության և գիտության նախարարության ոսկե հուշամեդալով՝ մատաղ սերնդի և երիտասարդության ռազմահայրենասիրական դաստիարակության գործում ներդրած ավանդի և «Պատանի երկրապահ» ճամբարային ռազմաուսումնական հավաքներին աջակցություն ցուցաբերելու համար:
Իր եզրափակիչ ելույթում ԵԿՄ նախագահ Մանվել Գրիգորյանը ևս շնորհակալություն հայտնեց գործարար եղբայրներին՝ ավանդույթ դարձած նախաձեռնության համար: Նրանց ծնողները՝ Ռոմիկ Բադալյանը և Անահիտ Մարգարյանը պարգևատրվեցին «ԵԿՄ 20 տարի» հոբելյանական մեդալներով: Իսկ Վահե Բադալյանին հանձնվեց «ԵԿՄ 25 տարի» հոբելյանական մեդալ:
1
2
3
4
5
1
2
3
4
1
2
3
4
5
